Your Tajikistan

Дар пайи кафидани ду ҳавзи об дар «Роғун» панҷ нафар осеб дидаанд Рӯзи 21-уми октябр дар сохтмони Неругоҳи барқи обии «Роғун» зарфи ҷамъоварии оби техникӣ кафида, об як қисми нақберо, ки дар он кормандони ширкати зерпудратии Sino Hydro кор мекарданд, фаро гирифтааст. Ба иттилои Хадамоти назорати давлатии бехатарии корҳо, касе осеби ҷисмонӣ надидааст. Ҳодиса тақрибан соати 16:15 дар нақби сохтмонии қабати чорум, бахши «Б», ҳангоми анҷоми корҳои сементатсионӣ рух додааст. Пас аз кафидани зарфи болоӣ зарфи поёнӣ низ осеб дидааст ва оби ҳар ду зарф якбора ба қисмати поёнии нақб, ки коргарон дар он ҷо буданд, ҷорӣ шудааст. 🩺 Ба иттилои хадамот, ба кормандон ёрии аввалияи тиббӣ расонида шуда, онҳо баъдан ба кор баргаштаанд. Аммо Радиои «Озодӣ» бо истинод ба манбаъҳои худ хабар додааст, ки дар натиҷаи ин ҳодиса беш аз панҷ нафар осеб дидаанд. Барои муайян кардани сабабҳои ҳодиса ва пешгирӣ аз такрори чунин ҳолатҳо гурӯҳи корӣ таъсис дода шудааст. Мутахассисон ҳолати зарфҳо, устувории васлкуниҳо ва риояи талаботи бехатариро месанҷанд. Дар шаш моҳи аввали соли ҷорӣ дар корхонаҳои саноатӣ ва истихроҷи маъдани Тоҷикистон 32 ҳодисаи нохуш ба қайд гирифта шудааст. Дар натиҷаи ин ҳодисаҳо 23 нафар ба ҳалокат расида, 19 нафари дигар ҷароҳат бардоштаанд. 📲 Your.tj дар ➡️ Telegram / Facebook / Instagram / TikTok / Threads