Your Tajikistan

ВКД номи фолбинону ҷодугаронро ба феҳристи махсус ворид мекунад Вазорати корҳои дохилии Тоҷикистон ният дорад, бо мақсади пешгирии хурофотпарастӣ ва амалҳои мардумфиребӣ, маълумоти фолбинону ҷодугарон ва дигар шахсони ба чунин фаъолият алоқамандро дар феҳристи махсус сабт кунад. Тавре ВКД рӯзи 21-уми октябр тавассути саҳифаи расмии худ дар Facebook хабар додааст, дар махзани махсуси вазорат ному насаби фолбинон, сеҳру ҷодугарон, нимчамуллоҳои дайду, фоҳишаҳо, мизоҷону наздикони онҳо, нашъамандон ва дигар шахсони ба ин амалҳо алоқаманд ворид карда мешавад. Ин афрод зери назорати доимӣ қарор гирифта, дар сурати дархости сохторҳои дахлдор маълумот дар бораи онҳо пешниҳод хоҳад шуд. ВКД аз шаҳрвандон даъват кардааст, ки аз чунин афрод дурӣ ҷӯянд ва ба амалҳое, ки боиси доғдор шудани номи онҳо дар назди фарзандон мегардад, роҳ надиҳанд. Мақомоти корҳои дохилӣ қаблан низ аз боздошти фолбинону ҷодугарон хабар дода, таъкид карда буд, ки барои ин гуна амалҳо ва муроҷиат ба чунин шахсон ҷавобгарӣ пешбинӣ шудааст. Бо вуҷуди ин, чунин ҳолатҳо ҳанӯз ҳам ба назар мерасанд. Бино ба маълумоти расмӣ, дар шаш моҳи аввали соли 2026 дар Тоҷикистон 604 нафар фолбину ҷодугар аз ҷониби мақомоти корҳои дохилӣ боздошт шудаанд. 📲 Your.tj дар ➡️ Telegram / Facebook / Instagram / TikTok / Threads