Your Tajikistan

Муовини аввали Президенти Эрон барои иштирок дар нишасти СҲШ ба Душанбе омад Муҳаммадризо Ориф, муовини аввали Президенти Эрон, 19 октябр ба Тоҷикистон омад. Ҳадафи сафари ӯ иштирок дар ҷаласаи Шӯрои сарони ҳукуматҳои Созмони ҳамкории Шонгҳой мебошад, ки 20 октябр дар Душанбе баргузор мегардад. Дар Фурудгоҳи байналмилалии Душанбе Ҳоким Холиқзода, муовини аввали Сарвазири Тоҷикистон, меҳмони эрониро истиқбол гирифтааст. Тибқи иттилои хабаргузории «ИРНА», сафари Ориф ду рӯз идома мекунад. Дар назар аст, ки ӯ зимни сафар бо сарони ҳукуматҳои баъзе кишварҳои иштирокдори ҷаласаи СҲШ низ мулоқот намояд. Муовини аввали Президенти Эрон пеш аз сафар хабар додааст, ки кишвараш барои тавсеаи ҳамкорӣ бо Созмони ҳамкории Шонгҳой барномаи дусола омода кардааст. Ин барнома ба истифодаи имкониятҳои созмон дар соҳаҳои нақлиёт, технологияҳои муосир ва зеҳни сунъӣ равона шудааст. 📲 Your.tj дар ➡️ Telegram / Facebook / Instagram / TikTok / Threads