Your Tajikistan

Навзоди аз таваллудхонаи №1-и Душанбе гумшуда пайдо шуд Кӯдаки навзоде, ки чанд рӯз пеш аз таваллудхонаи №1-и Душанбе ғайб зада буд, зиндаву саломат пайдо шуда, ба модараш супурда шудааст. Дар ин бора Раёсати Вазорати корҳои дохилӣ дар шаҳри Душанбе хабар дод. Айни замон писарбача дар амон буда, дар паҳлӯи модараш қарор дорад. Аммо мақомоти милитсия ҳанӯз дар бораи макон ва шароити пайдо шудани кӯдак маълумот надодаанд.Қарор аст, ҷузъиёти ҳодиса баъдтар расман эълон шавад. Ёдовар мешавем, ки 11 октябр Мавзуна Акрамоваи 19-сола, сокини ноҳияи Нуробод, дар Пажӯҳишгоҳи илмии акушерӣ, гинекологӣ ва перинатологии Тоҷикистон, ки бо номи таваллудхонаи №1 маъруф аст, фарзанди нахустинашро ба дунё овард. Ба гуфтаи наздикони оила, тақрибан соати 01:00-и шаби 12 октябр навзод аз муассисаи тиббӣ ғайб задааст. Дар бораи ин ҳодиса кормандони таваллудхона ба хонавода хабар додаанд. Субҳи 13 октябр маъмурияти муассисаи тиббӣ ғайб задани кӯдакро тасдиқ кард. Ҷустуҷӯи навзодро кормандони милитсия ба роҳ монда буданд. То ҳол маълум нест, ки кӣ ва дар кадом шароит кӯдакро аз таваллудхона берун бурдааст. 📲 Your.tj дар ➡️ Telegram / Facebook / Instagram / TikTok / Threads