Your Tajikistan

Қонуни нави муҳоҷират дар Тоҷикистон: ҳифзи ҳуқуқи муҳоҷирон ва рақамикунонии равандҳо Парлумони Тоҷикистон 7 октябр тарҳи қонуни нави «Дар бораи муҳоҷират»-ро қабул кард. Санади мазкур ба ҳифзи бештари ҳуқуқи муҳоҷирони меҳнатии тоҷик ва аъзои оилаи онҳо, танзими фаъолияти ширкатҳои хусусии шуғлёбӣ дар хориҷ ва рақамикунонии равандҳои муҳоҷират равона шудааст. Дар ин бора нашрияи парлумонии «Садои мардум» хабар медиҳад. Вазири меҳнат, муҳоҷират ва шуғли аҳолӣ Солеҳа Холмаҳмадзода зимни баррасии тарҳ дар ҷаласаи парлумон изҳор доштааст, ки қонуни соли 1999 қабулшуда дигар ба талаботи замони ҳозира ҷавобгӯ нест. Ба гуфтаи вазир, қабули санади нав бояд ба коҳиши муҳоҷирати ғайриқонунӣ, таъмини шаффофияти равандҳо ва таъсиси низоми ягонаи иттилоотии муҳоҷират мусоидат кунад. Дар тарҳи қонун масъалаҳои ҳамгироии дубораи муҳоҷирон ба ҷомеа пас аз бозгашт, тартиби бозгардонии онҳо, ба назар гирифтани хусусиятҳои гендерӣ ва ҳифзи гурӯҳҳои осебпазир низ пешбинӣ шудаанд. Аз Вазорати меҳнат, муҳоҷират ва шуғли аҳолӣ хабар доданд, ки қонуни соли 1999 пас аз тасдиқи санади нав аз ҷониби Маҷлиси миллӣ, имзои Президенти Тоҷикистон ва нашри расмии он бекор карда мешавад. 📲 Your.tj дар ➡️ Telegram / Facebook / Instagram / TikTok / Threads