Your Tajikistan

Покистон ният дорад содироти гӯшт ба Тоҷикистонро афзоиш диҳад Покистон Тоҷикистонро ба рӯйхати 14 кишвари воридкунандаи маҳсулоти гӯштии худ шомил карда, нақша дорад интиқоли гӯшт ва маҳсулоти шириро ба кишварҳои Осиёи Марказӣ густариш диҳад. Дар ин бора хабаргузории Associated Press of Pakistan бо истинод ба санадҳои Вазорати тиҷорати Покистон иттилоъ додааст. Тибқи нақшаи дусолаи рушди содироти маҳсулоти кишоварзӣ барои давраи сентябри соли 2026 то августи соли 2028, Покистон ният дорад ба кишварҳои Иттиҳоди Давлатҳои Мустақил, аз ҷумла Тоҷикистон, Қазоқистон, Ӯзбекистон ва Озарбойҷон, ҳайатҳои тиҷоратӣ фиристад. Мувофиқи маълумоти Хадамоти гумруки Тоҷикистон, дар моҳҳои январ–сентябри соли 2026 ба кишвар беш аз 21,4 ҳазор тонна гӯшт ва маҳсулоти хӯрокии иловагӣ ба маблағи тақрибан 84 миллион доллар ворид шудааст. Ин нишондиҳанда аз рӯи арзиш нисбат ба ҳамин давраи соли гузашта 60,3 фоиз зиёд мебошад. Беларус, Қазоқистон, Украина, Покистон ва Ӯзбекистон аз таъминкунандагони асосии бозори гӯшти Тоҷикистон ба шумор мераванд. 📲 Your.tj дар ➡️ Telegram / Facebook / Instagram / TikTok / Threads