Your Tajikistan

Дар Тоҷикистон назорати пардохти маош пурзӯр мешавад Вазорати меҳнат, муҳоҷират ва шуғли аҳолии Тоҷикистон тасмим дорад назоратро аз болои пардохти саривақтии музди меҳнат, риояи қонунгузории меҳнат ва таъмини бехатарии кормандон дар ҷойи кор тақвият диҳад. Ин масъалаҳо 13 октябр дар ҷаласаи ҳайати мушовараи вазорат бо роҳбарии вазир Солеха Холмаҳмадзода баррасӣ шуданд. Дар ҷаласа ба масъалаи муҳоҷирати меҳнатӣ низ таваҷҷуҳи махсус зоҳир гардид. Аз ҷумла, дастгирии шаҳрвандоне, ки аз хориҷ ба кишвар бармегарданд, бо ҷойи кор таъмин намудани онҳо дар Тоҷикистон ва фароҳам овардани имкониятҳои бештар барои бо роҳи муташаккилона ба кор рафтани шаҳрвандон ба хориҷи кишвар мавриди баррасӣ қарор гирифтанд. Ҳамчунин, иштирокдорон масъалаҳои омӯзиши касбии аҳолӣ, таъсиси ҷойҳои нави корӣ, пешгирии ҳодисаҳои нохуш дар истеҳсолот ва ҳифзи ҳуқуқҳои меҳнатии шаҳрвандонро муҳокима карданд. Дар ҷамъбасти ҷаласа Солеха Холмаҳмадзода ба роҳбарони сохторҳои дахлдор супориш дод, ки камбудиҳои ошкоршударо бартараф намуда, иҷрои барномаҳои соҳавиро таҳти назорати ҷиддӣ қарор диҳанд ва барои амалӣ шудани вазифаҳои гузошташуда то охири сол чораҳои зарурӣ андешанд. 📲 Your.tj дар ➡️ Telegram / Facebook / Instagram / TikTok / Threads