Your Tajikistan

Эмомалӣ Раҳмон дар нишасти сарони ИДМ самтҳои асосии ҳамкориҳои минтақавиро муайян кард 9 октябр Президенти Тоҷикистон Эмомалӣ Раҳмон дар ҷаласаи Шӯрои сарони давлатҳои Иттиҳоди Давлатҳои Мустақил (ИДМ), ки дар минтақаи Авазаи Туркманистон баргузор гардид, иштирок ва суханронӣ кард. Дар ин бора хадамоти матбуоти Президенти Тоҷикистон хабар медиҳад. Дар оғози суханронӣ Эмомалӣ Раҳмон барои баргузории нишаст ва пазироии самимӣ ба ҷониби Туркманистон изҳори сипос намуда, ин кишварро ба анҷоми муваффақонаи раёсат дар ИДМ табрик гуфт. Сарвари давлат таъкид кард, ки дар тӯли 35 соли фаъолияти ИДМ ин созмон ба минбари муҳими муколамаи сиёсӣ, густариши робитаҳои иқтисодиву гуманитарӣ ва ҳамкориҳо дар масъалаҳои амният табдил ёфтааст. Ба гуфтаи ӯ, Иттиҳод мутобиқи шароити нав ва чолишҳои замони муосир фаъолияти худро мутобиқ месозад. Дар идомаи суханронӣ Президенти Тоҷикистон аз ҷумлаи самтҳои ояндадори ҳамкорӣ рушди технологияву навоварӣ, рақамикунонӣ, зеҳни сунъӣ, иқтисоди «сабз» ва энергетикаи барқароршавандаро номбар кард. Ҳамчунин, ӯ ба зарурати таҳкими робитаҳои нақлиётӣ миёни кишварҳо, афзоиши гардиши савдо ва сармоягузорӣ, густариши ҳамкориҳои саноатӣ ва тақвияти ҳамкорӣ дар соҳаи амният ишора намуд. Эмомалӣ Раҳмон ташаббуси Тоҷикистонро дар бораи эълон кардани солҳои 2027–2036 ҳамчун «Даҳсолаи байналмилалии таҳкими сулҳ ба хотири наслҳои оянда» ёдовар шуда, изҳор дошт, ки ин пешниҳод аз ҷониби ҷомеаи ҷаҳонӣ дастгирӣ ёфтааст. Ба иттилои манбаъ, моҳи июни соли 2027 Тоҷикистон дар ҳамкорӣ бо Созмони Милали Муттаҳид ва шарикони байналмилалӣ дар Душанбе конфронси байналмилалии сатҳи баландро баргузор мекунад. Ҳадафи он оғози расмии Даҳсола мебошад. Президенти Тоҷикистон умедворӣ кард, ки кишварҳои узви ИДМ дар ин ҳамоиш ва татбиқи ҳадафҳои ташаббус фаъолона иштирок мекунанд. Дар анҷоми суханронӣ Эмомалӣ Раҳмон қарорҳои дар ҷаласа баррасишавандаро ҷонибдорӣ карда, омодагии Тоҷикистонро ба идомаи ҳамкориҳои созанда дар доираи ИДМ таъкид намуд. 📲 Your.tj дар ➡️ Telegram / Facebook / Instagram / TikTok / Threads