"Чолбон" бөлөх уолаттарын барыларын билэр уонна доҕордуу сыһыаннаах буоламмын бэҕэһээҥҥи киинэ премьератыгар хайаан да барыахтаахпын диэн тиийэн көрдүм. Кырдьык даҕаны "на одном дыхании" киһи көрөр киинэтэ. Мин урукку документальнай киинэлэргэ үөрэммит киһи буоларым быһыытынан ити тылтан хайдах эрэ кыратык сэрэхэдийэ санаабытым. Онтукайым отой бэртээхэй, элбэх саҥа билиини биэрэр киинэ эбит. Историческай киинэ диэн даҕаны ааттыахха сөп. Манна даҕатан эттэххэ бэҕэһээ эдэр ыччат элбэҕиттэн сүрдээҕин сүргэм көтөҕүлүннэ. Эрэл баар эбит дии санаатым. Тоҕо диэтэххэ "Чолбон" диэн көҥүл тыын, кырдьык уонна саха холбоспута буолар. Киинэҕэ Тумус Мэхээлэттэн саҕалаан бары кыттыыны ылбыт дьон бары ааттаммыттар, көстүбүттэр. Урукку продюсердара баар, элбэх Россияҕа биллэр музыканнар, музыкальнай критиктар көстөллөр. Бу сахалыы рок-музыка үөскээн тахсыбыт кэмэ оруобуна урукку идеология эстэн, дьон саҥа өйгө-санааҕа наадыйан эрэр кэмигэр буолбута мээнэҕэ буолбатах. Бу Үрүҥ Аар Айыы таҥмыт оҥоһуута. Биһиги курдук аҕыйах ахсааннаах омук Россияҕа элбэх да буоллар кинилэргэ биһиэхэ курдук "Чолбон" таһымыгар тиийбит рок-группалар суохтар. Саха омук бэйэтин билинэригэр, саҥа олоххо бэлэм буоларыгар, СҮР-дээх курдук сананарыгар "Чолбон" оруола сүдү. Кинилэр күүстээх тыыннаах музыкалара, дьон ходьох гынар тэтимнэрэ, ырыаларын хорсун тыллара кырдьыктыы оччотооҕу ыччакка улаханнаах сабыдыал оҥорбуттара чуолкай. Өссө "суверенитет" бэриллэ илигинэ, өссө бобуу-хаайыы бүтэ илигинэ кинилэр көҥүл санаалаах хамсааһыннара саҕаламмыта. Бу киинэ тахсыбытынан режиссёр Кыйаара Юмшановаҕа уонна продюсердарга Сардаана Саввинаҕа, Любовь Борисоваҕа махтанан туран саха дьонун барыгытын эҕэрдэлиибин! Бука бары кинотеатрдарга бара сылдьыҥ, көрүҥ, санааҕытын сааһыланыҥ, күүстээх энергетиканы бэйэҕитигэр иҥэриниҥ диэн ыҥырабын! "Чолбоннорго" уруй! Устубут хамаандаҕа айхал! Сахаларга уруй-айхал!