Қазақстанда өнеркәсіп саясатын қайта қарау қажет пе? Өткен аптада Алматыдағы «Парасат» бизнес клубында сарапшылар Қазақстанның өнеркәсіп саясатын талқыға салды. Саясаттанушы Досым Сәтбаев осыған дейін Қазақстанда өткізу нарығын түсінбей жатып жаңа зауыт салуды өнеркәсіп саясаты деп қабылдау қателік болды дейді. «Бізде алдымен лента қиылатын, содан кейін ол зауыттың тағдыры түсініксіз болып қалатын. Өткізу нарығы да, тұрақты өндіріс те болмайтын», — деді Сәтбаев. Талқыға қатысушылар экономиканы дамытуға кедергі болып отырған басты нәрсе — шикізатқа арқа сүйеу дегеннен гөрі, институттардың әлсіз болуы мен нәтижеге жауап беретін арнайы өкілеттілігі бар ведомствоның болмауы деген пікірге келісті. «Біздің экономика тұрғысынан артта қалғанымызға ресурстар кінәлі деген түсінік — жаңсақ. Бұл ішімдікке құмарлықты еңбекақының жоғары болуына сілтеумен бірдей. Шын мәнінде институттар кінәлі», — деді экономист Рахымбек Әбдірахманов.