Шымкенттің төртінші ықшамауданында тандыр самса дайындайтын ондаған нүкте орналасқан. Былай қарасаң, бір жерге бұлай шоғырлану бәсеке тудыруға тиіс еді, бірақ бұл маң, керісінше, Шымкент картасындағы жергілікті гастрономия орталығына айналды. Исатай Минуаров бір көшенің мысалында «оңтүстік кәсіпкерлігінің» ерекшелігі мен тұрғындардың күнделікті тұрмыс мәдениетін баяндайды. Мәзірді қарап отырып, күтпеген жерден «бургер самса» деген тағамды байқап қалдым. Алғашқыда жай әзіл сияқты көрінген. Кейін ойланып қарасам, Шымкенттің болмысы дәл осында жатыр екен. Мұнда дәстүрді құрметтейді, бірақ онымен эксперимент жасаудан да еш қорықпайды.