Bugun mamlakatimizda amalga oshirilayotgan islohotlarning bosh mezoni, inson qadrini ulug‘lash va odamlarning dard-u tashvishlari bilan yashashdan iborat. Ushbu ezgu g‘oyaning amaldagi yorqin ifodasini mana 25-yildirki yurtimiz temir yo‘llari bo‘ylab kezib kelayotgan, xalq orasida “najot karvoni” nomini olgan “Salomatlik” tibbiy-sanitar yordam poyezdi faoliyatida ham ko‘rish mumkin.Brigada tarkibidagi tajribali terapevt, nevropatolog, pediatr, ginekolog, endokrinolog, dermatolog va stomatologlar olis ovullardagi ijtimoiy himoyaga muhtoj qatlamlar, keksalar hamda nogironligi bo‘lgan shaxslarni chuqurlashtirilgan tibbiy ko‘rikdan o‘tkazib kelmoqda. Darhaqiqat, 25-yil, tarix uchun qisqa fursat bo‘lsa-da, “Salomatlik” poyezdi uchun bu millionlab sog‘lomlashtirilgan insonlar, asrab qolingan hayotlar, minglab kilometr masofalar va xalqning davlatdan rozilik tuyg‘usi demakdir. Chorak asr davomida jazirama issiq va qahraton sovuqlarga qaramay, poyezd jamoasi relslar orqali insonlarga sog‘lik va tabassum ulashishda davom etadi. |Site|Telegram|Facebook|YouTube|Instagram|X