Raqamlashtirish — zamonaviy temir yo‘l taraqqiyoti yo‘lida “Temiryo‘linfratuzilma” AJ Lokomotivlardan foydalanish boshqarmasining “Raqamlashtirish va innovatsion rivojlanish” bo‘limi zamonaviy talablarga mos ravishda qayta ta’mirlanib, faoliyat yuritish uchun yangi sharoitlar yaratildi. 2026-yil 2-oktabr kuni “Temiryo‘linfratuzilma” AJ Boshqaruvi raisi S.A. Norqabilov yangidan ta’mirlangan bo‘limga tashrif buyurdi. Tashrif davomida raqamlashtirish yo‘nalishida amalga oshirilgan ishlar va zamonaviy axborot texnologiyalari bilan tanishildi. Shuningdek, bo‘lim devorida tasvirlangan zamonaviy va innovatsion ruhdagi surat ham alohida e’tiborni tortdi. Mazkur dizayn bo‘limning asosiy faoliyati — raqamlashtirish, innovatsiya va zamonaviy texnologiyalarga bo‘lgan e’tiborini o‘zida aks ettiradi. Jumladan, “Smart depo”, “Navbatchi24”, “Ta’mir tahlil” va GPS monitoring tizimlari hamda boshqa raqamli loyihalar taqdimoti o‘tkazildi. Mazkur tizimlar ishlab chiqarish jarayonlarini avtomatlashtirish, tezkor monitoring va tahlil qilish, boshqaruv samaradorligini oshirish hamda inson omilini kamaytirishga xizmat qiladi. Yangi bo‘lim kelgusida temir yo‘l sohasiga ilg‘or IT texnologiyalarini joriy etish, yangi raqamli loyihalarni ishlab chiqish va innovatsion yechimlarni amaliyotga tatbiq etish bo‘yicha muhim markazlardan biri bo‘lishi ko‘zda tutilmoqda. Raqamlashtirish — samaradorlik, shaffoflik va zamonaviy boshqaruv sari muhim qadamdir. "Temiryo‘linfratuzilma” AJ matbuot xizmati. 👍 🌎railwayinfra.uz ❤️🔥Telegram ❤️🔥Facebook ❤️🔥Instagram