Ақалақь Гәдауҭа амш ныҳәа Ақалақь Гәдауҭа амш ныҳәа инамаданы, уажәы ааигәа еиҭашьақәыргылаз аԥшаҳәаҿын 10-метрак аура, 20-метра аҭбаара змоу Аԥсны бираҟ шьҭыхын. Аныҳәа иалахәын араион ахадара, атәыла аиҳабыра, аҭыԥантәи ауааԥсыра. Ақалақь Фырхаҵа Гәдауҭа ҭоурыхла ибеоу қалақьуп. Аԥсны аибашьра анцоз, ахәцәеи, аԥсцәеи здызкылоз, зыҩны иахыҵыз ауааԥсыреи еиднакылоз, ауадаҩреи агәырҩеи цәгьеи зхызгаз қалақьуп. Иахьа ашьшьыҳәа араион аҭынч ԥсҭазаара иануп, иумбарц залшом аамҭа маҷк иалагӡан ақалақь аҟны ицо аҽыԥсахра бзиақәа. Гәдуаҭа акурорт қалақьқәа ирхыԥхьазалоуп. Иахьатәи ақалақь амш аҽны абираҟ шьҭыхра азин ирҭеит Аԥсны Афырхаҵа Геннади Маан. «Аԥхьаҟа бзиа еицаабо Гәдауҭа ԥшӡа иазеиӷьаҳшьап, аизҳареи аҭышәынтәалареи аманшәалара. Ахаан иҟамлааит аибашьра, еиҵагылааит абиԥара хазына. Гәык-ԥсык ала ҳшәыдныҳәалоит!» Ареспубликатә политикатә партиа «Аԥсны Акзаара» аполитхеилак ахьӡала!