⚡️13 дугаар соңгулда участогу: Кызылчылар идепкейлиг бадылап турар Кызылдың 13 дугаар соңгулда участогунуң даргазы Есения Ооржактың дыңнатканы-биле алырга, 12.00 шакка чедир 600 хире соңгукчу бадылаан. «Соңгукчуларның чамдыызы участок ажыттынмаанда-ла чедип келген. Олар албан-биле манап алгаш, хамааты хүлээлгезин күүсеткен. Ол дээрге чоннуң келир үе дээш сагыжы аарып турарының база ада-чуртчу чоруунуң херечизи -дир. Көжүп чоруур комиссия үш хүннүң дургузунда 400 хире медицина албан черлеринде эмнедип турар улуска чедер. Кадыкшылының байдалы азы назылап кырааны-биле кээп шыдавас соңгукчуларның саны 30 хире, оларга база чедер бис» – деп, Есения Ооржак чугаалаан. Соңгулда хүннеринде Кызылга Хөй-ниити хайгааралының төвү ажылдаар. Тываның соңгулда комиссиязы медээзи-биле алырга, республикада 210820 соңгукчу бүрүткеттинген, оларның 78260-зы административтиг төпте. Сентябрьның 18, 19, 20 хүннеринде 8:00 шактан 20:00 шакка чедир, бүрүткеткен чериңер аайы-биле соңгулда участоктарынга баргаш, бадылап болур силер.