Камал театрында зур премьера: Йолдыз Миңнуллина пьесасы буенча режиссер Лилия Әхмәтҗанова-Нурель куелышындагы «Такташ. Югалган матурлык» документаль драмасы. Сюжет үзәгендә иҗаты катгый таләпләр чоры - 1920-1930 еллар белән кисешкән татар шагыйре язмышы. Спектакль премьерасы уңаеннан Татарстан Республикасы Милли музее Һади Такташның шәхси әйберләре, кулъязмалары, фотографияләрдән торган күргәзмә әзерләде. Әлеге күргәзмәдә Такташның әнисе улы вафат булгач аңа багышлап язган бәет текстын һәм Шәмсениса ханым үзе бәйләгән челтәрләрне күрергә мөмкин. Бу күргәзмә ТР Милли музее фондларында сакланган Такташ коллекциясе һәм архивына нигезләнә.