ТРОПАРЬ И КОНДАК НА ПЕРЕНЕСЕНИЕ МОЩЕЙ МИХАИЛА ЧЕРНИГОВСКОГО ИЗ ЧЕРНИГОВА В МОСКВУ В КРЕМЛЕВСКИЙ СОБОР АРХАНГЕЛА МИХАИЛА, НАПИСАННЫЙ РУССКИМ ЦАРЕМ ИВАНОМ IV ВАСИЛЬЕВИЧЕМ (1578 г.) НА ПРЕНЕСЕНИЕ МОЩЕМ ТРОПАРЬ ВЕЛИКОМУ КНЯЗЮ МИХАИЛУ ЧЕРНИГОВСКОМУ. ТВОРЕНИЕ ИВАНА, БОГОМУДРАГО ЦАРЯ, САМОДЕРЖЬЦА РОСИЙСКАГО Глас 8. Троичнаго Божества осианиемъ просвѣтився, пресьвѣтле и всеблаженне, великий княже Михаиле, з доблим и всемудрым болярином ти Феодоромъ, ярости нечестиваго царя не убоявшеся исповѣдания ради Святыя Троица, самозваннии к подвигом устремистеся и видимому сему солнцу паче праведнаго солнца Христа не поклонистеся, кусту же и огню и идолом не поклонистеся, но поплевасте. Кровии своихъ струями обагрившеся, востекосте радостно ко Господу господем и Царю царем, Господу нашему Исусу Христу, в Троице славимому, от него побѣдная вѣнца приясте и своими кровии страдании тогда всю Рускую землю от нечестия свободисте, — тако и нынѣ своимъ пришесьствиемъ насъ свыше назирайте, предстояще у престола Владыки Христа, моляще Святую Троицу избавитися намъ от ходящих ны золъ: душевных согрѣшений, и телесных болѣзней, и варварскаго нахождения, и межуусобныа брани, и всяких скорбей, душевных и телесных, и мятежей. Молим вы, святии, яко да вашими святыми молитвами подасть нам вся благая Христос человѣколюбець, прославляемый во святых своихъ. Кондак. Глас 5. Солнца мысленаго, праведнаго Христа, озарився сияниемъ пребогате, Михаиле, видимому солнцу не поклонился еси, и твари паче Творца не послужилъ еси, и нечестия обуздал еси; ярости царя не убоявся и кровии своихъ обагрении Христови предсталъ еси, радуяся. И нынѣ в пренесении мощей твоихъ нас свыше назирай и Христа, Бога нашего, молити тебѣ о нас молимся, яко спастися намъ и державы царствия непоколебимо, отечество ваше соблюсти о всѣхъ противныхъ иноплеменных, и межуусобных ратей, и мятежа, и оскудения, и праведнаго Господня гнѣва, и прещения возвратити и сохранити Господу Богу нашему Исусу Христу во всемъ молитвами твоими, — святителя же, и царя, и вся люди по велицей его милости.