«Тэҥнээх кэпсэтии» бырайыак чэрчитинэн «Сайдар кэмп» лааҕыр кыттыылаахтарын кытта көрүстүм. М. К. Аммосов аатынан ХИФУ өйөбүлүнэн «ZЕМА» ыччат түмсүүтэ тэрийбит, абитуриеннарга уонна бастакы куурус устудьуоннарыгар аналлаах лааҕырга быйыл Саха сирин араас улуустарыттан 520 оҕо кытынна. Икки нэдиэлэ устата кинилэр интерактивнай былаһааккаларга, спортивнай уонна айар тэрээһиннэргэ кытыннылар, бэйэ-бэйэлэрин кытта билсистилэр уонна саҥаны биллилэр-көрдүлэр. Үгүстэргэ бу лааҕыр үлэтэ куоракка олохсуйууга, бэйэни салайыныыга бастакы уопутунан буолла. Маннык көрүҥ ыччаттар куорат олоҕор түргэнник үөрэнэллэригэр, доҕоттору булуналларыгар көмөлөһөр. Көрсүһүү кэмигэр устудьуоннар олох-дьаһах, идэни талыы, үлэҕэ бастакы хардыылары оҥорууга сыһыаннаах боппуруостар тула санаа атастастылар. Мин бэйэм үөрэммит сылларым, идэбин саҕалаабыт кэмнэрим туһунан ахтан-санаан, уопуппун үллэһинним. Устудьуоннарга ситиһиилээх үөрэҕи, саҥа доҕоттору, интэриэһинэй бырайыактары уонна бэйэлэригэр эрэллээх буолалларыгар баҕарабын! Бу саҥа олох түһүмэҕэ элбэх кыаҕы, билиини, чаҕылхай ситиһиилэри аҕаллын! https://max.ru/channel_PetrShamaev