Россия Судаарыстыбаннай былааҕын күнүнэн Чурапчы улууһун салалтатын уонна тус бэйэм ааппыттан улуус бары олохтоохторун истиҥник эҕэрдэлиибин! Россия үс өҥнөөх былааҕа көҥүлү, тутулуга суох буолууну, олорон кэлбит уопсай устуоруйабытыгар дириҥ ытыктабылы, ыччаты Ийэ дойдуга итии таптал тыыныгар иитиини кэрэһилиир. Судаарыстыбаннай былаах устуоруйата төрөөбүт дойдуларын туһугар турууласпыт үгүс көлүөнэ дьон сыралаах үлэтин уонна албан аатын кытта быстыспат ситимнээх. Россия састаабыгар олорор Саха сирэ, ол иһигэр биһиги Чурапчыбыт улууһа, түөрт үйэ кэриҥэ Россия судаарыстыбатын бөҕөргөөһүнүгэр, кэскилигэр дьоһун кылааттарын киллэрэллэр. Ол курдук, биһиги улууспут тыа хаһаайыстыбатын өрө тутан күүскэ сайыннарар бастыҥ улуус буолан, эти-үүтү хото дэлэтэн, өрөспүүбүлүкэҕэ уонна дойду таһымыгар ыытыллар тыа хаһаайыстыбатын улахан дьаарбаҥкаларыгар өрүү инники күөҥҥэ сылдьарынан киэн туттабыт. Чурапчы улууһа ону таһынан үөрэх, култуура, спорт, онтон да атын хайысхаларга сайдыытын таһымынан Россия, Саха сирин ханнык да оройуоннарыттан хаалсыбата, сороҕор ордук ситиһиилээҕэ астыннарар. Улууспутугар дойдубут национальнай бырайыактарынан олорор дьиэлэр, суоллар, оскуолалар уонна оҕо уһуйааннара, балыыһалар, култуура дьиэлэрэ уонна успуорт эбийиэктэрэ тутуллаллар, гаастааһын күүскэ барар. Россия судаарыстыбата кыра дохуоттаах дьоҥҥо уонна нэһилиэнньэ көмүскэлэ суох араҥатыгар социальнай көмөнү оҥорор. Ханнык да уустук кэмнэр тирээтэллэр улууспут олохтоохторо Аҕа дойдубут көмүскэлигэр туруналлара. Күн бүгүн Чурапчы хорсун-хоодуот дьоно туора дойдулар Россия кэскилин сарбыйарга сорунар уодаһыннаах дьайыыларыттан көмүскүүр уонна дойдубут тутулуга суох көҥүл судаарыстыба буоларын туһугар Россия былааҕын аннынан анал байыаннай дьайыыга кытталлар. Бу үрдүк аналларын чиэстээхтик толоро сылдьар хас биирдии киһибитинэн биһиги бука бары киэн туттабыт! Улуу устуоруйалаах модун дойдубут өссө эбии күүстээх, сайдыылаах судаарыстыба буоларын туһугар салгыы биир сомоҕо түмсүүлээхтик үлэлиэхпит диэн эрэнэбин. Россия Судаарыстыбаннай былааҕын күнүнэн эһиэхэ дьолу-соргуну, чэгиэн-чэбдик туругу, этэҥҥэ буолууну, или-эйэни баҕарабын!