Сахам сирин улуустарынан сылдьан олохтоохтору кытта тус көрсөн кэпсэтиим олоххо көрүүбүн кэҥэтэр, ис хоһоонун байытар уонна санаабар күүс эбэр, айар-тутар баҕабын күүһүрдэр 🇷🇺 Нам улууһун Көбөкөн нэһилиэгин биир ньир-бааччы олорор, убаастанар ыалыгар – Евдокия Семеновна уонна Семен Николаевич Петровтарга ыалдьыттаатым. Кинилэр сахалыы балаҕаннарыгар олох туһунан дириҥ ис хоһоонноох, истиҥ кэпсэтииттэн улахан астыныыны уонна иһирэх санааны ыллым ❗️ Көбөкөн нэһилиэгин дьоно-сэргэтэ бэрт сэргэхтик, нус-хас дьаһанан олорорун сэргии көрдүм. Ол курдук, нэһилиэк саҥа талыллыбыт баһылыга Илларион Пестерев этэринэн, үгүс ыал аныгылыы таһымнаах, толору хааччылыылаах дьиэлэргэ олорор. Маннык сайдыылаах кэмҥэ күннээҕи дьиэ ис-тас үлэтин түбүгэ аҕыйаабыта аныгы көлүөнэни иитиигэ саҥа ирдэбили туруорар. Хос сиэннэнэн, күндү кырачааннара кэлэрин кэтэһэн олорор дьоллоох дьиэ кэргэн ийэтэ, эбээтэ, хос эбээтэ Евдокия Семеновна ыччаппытын хайаан да үлэҕэ, сиэрдээх майгыга иитиэхтээхпит диэн санаатын үллэһиннэ. «Үлэлээн-хамсаан, тиритэн-хорутан, олох уустуктарын бэйэтин күүстээх санаатынан аастаҕына эрэ оҕо олоххо толору бэлэм буола улаатар. Ону тэҥэ оҕону кураанах тылынан буолбакка, бэйэ күннээҕи олоҕун үтүө холобурунан иитэҕин. Оҕо тулатыгар туох буоларын барытын көрө-истэ сылдьан үөрэнэр. Билигин аан дойдуга уустук кэмнэр турдулар, айылҕа алдьатыылаах быһылааннара тахса тураллар. Биһиги, сахалар, тыйыс айылҕалаах сиргэ олорор буолан, кини улуу күүһүгэр сүгүрүйэбит уонна үйэлэр тухары айылҕа сокуоннарын кытта ситимнээхпит. Билигин материальнай сыаннастарга охтуу, сырсыы күүһүрдэ. Ол эрээри олоххо саамай сүрүнэ – чэгиэн-чэбдик буолуу, үтүө санааны, киһилии быһыыны-майгыны өрө тутан олоруу буолар», – диир Евдокия Семеновна. Кини билигин хайаан да түмсүүлээх буолуохтаахпытын ордук бэлиэтээн эттэ. Биһиги уопсастыба, судаарыстыба тиһилигэр олорор дьон буоларбытынан, уопсай дьыалаҕа бэриниилээхтик үлэлээн, туһаны аҕаларбыт ордук диэн дириҥ өйдөбүлү тиэрдэр 🇷🇺 Үтүө мааны дьон сырдык сүбэтин-аматын өссө да уһуннук истэ олоруох курдукпун. Евдокия Семеновна төрөөбүт тылбытын, үгэспитин уонна култуурабытын норуот быһыытынан илдьэ сылдьарбыт булгуччулаах суолталааҕын тоһоҕолоото. Олох сайдыылаах тэтимин кытта тэҥҥэ эрэллээхтик хааман иһиэхтээхпитин, бу уустук үйэҕэ үлэһит, үтүө санаалаах уонна түмсүүлээх норуот эрэ сайдыы суолун тутуһан, эрэллээхтик иннин диэки хаамыаҕын, кэскилин бигэтик тутуоҕун ордук бэлиэтээтэ ✔️ #сомоҕоноруот #дьоҥҥокыһамньы #үтүөтүмүктэр