Ытыктабыллаах саха дьоно уонна Саха Сирин бары төрүт олохтоохторо! Сахалар бары - баай-дьадаҥы, илин-арҕаа, эр киһи-дьахтар диэн арахсыбакка уһуктар, өйдөнөр, түмсэр кэммит кэллэ! Билиҥҥи салалта, билиҥҥи депутаттар баһыйар үгүс өттүлэрэ норуоттан тэйбиттэрэ, норуоттарын интэриэһин көрбөттөрө, кыһаллыбаттара бу кэнники кэмҥэ наһаа чуолкайдык көһүннэ, билиннэ Ол иһин бу сыл ахсынньы 15 күнүгэр "Добун" общественнай тэрээһин бастакы киэҥ ыҥырыылаах мунньаҕын тэрийэбит. Бары активнай позициялаах, саха туһунан, дойдубут туһунан, ыччаппыт инникитин туһунан саныыр, толкуйдуур, кыһаллар дьон кыттыһан тэрийиэххэ. Бары саба түһэн көмөлөстөхпүтүнэ, кыттыстахпытына эрэ бу тэрээһин үрдүк таһымҥа барыаҕа. "Биһиги күүспүт түмсүүгэ" диэн девизтээх буоллахпытына эрэ бу былааһы кытта тэҥҥэ аахсар, бэйэбит тыын интэриэспитин көмүскүүр, тэрээһиннээх дьон буолар кыахтаахпытын өйдүүр кэммит кэллэ. Манна ким төһөнү кыанарынан кыттыстаҕына барыта табыллыаҕа, барыта сатаныаҕа, барыта ситиһиилээх буолуоҕа. Мин ордук чааһынай бизнесменнэри кыттыһыҥ диэн чорботон этиэхпин баҕарабын. Эһиги уратыгыт диэн - кыттыһары бэккэ билэҕит даҕаны, сатыыгыт даҕаны. Ол гынан баран чиновниктар эһигини политикаҕа чугаһаппаттар, кыттыһыннарбаттар - "политика диэн кирдээх дьыала" иҥин диэн араас сымыйа өйдөбүллэри туһананнар. Бэйэлэрэ эрэ бюджет үбүн-харчытын айбардаарылар. Дьиҥинэн эһиги буолаҕыт бу бүгүҥҥү күҥҥэ былааһы ылыахтаах, түмсүөхтээх, бэйэ-бэйэҕитин өйөнсүөхтээх, сомоҕолоһуохтаах киэҥ уонна саамай прогрессивнай араҥа. Маннык тэрээһиннэри өйөөтөххүтүнэ, бэйэҕит интэриэскитин политика нөҥүө көмүскүүргэ үөрэннэххитинэ эрэ дьиҥнээхтик сайдыаххыт, норуоккутун урукку Манньыаттаах уолун, Баай Батаакап, Баай Барашков, Боһуут курдук өрө тардыаххыт. Кытаатыҥ, кыттыһыҥ! Ол иһин саха туһа, ыччаппыт туһа, дойдубут туһа диэн түмсүөххэ! Ким 100, ким 1000, ким 10000 солкуобайынан кыттыһыахха! Дьиҥнээхтик сомоҕолоһуохха! Ps: Үп-харчы хомуйар сирбит официальнай аадырыһа ДОБУН. РФ диэн сайт. Онно аллараа өттүгэр "пожертвование" диэн баар. Онно киирэн ыытаҕыт. Ил Түмэн 1-кы, 2-с, 7-с ыҥырыытын депутата Владимир Поскачин