... Аптаах ааны арыйан Ааспыт кэмҥэ тиийэбин: Ийэм-аҕам тапталын Илгэтигэр умсабын... Сырдыгынан сыдьаайан, Сылааһынан илгийэн, Улам көстөн кэллилэр Умнуллубат кэрчиктэр. Оһох уота тыһыргыыр, Оргууй ийэм ыҥырар, Остуол тула олордор, Оскуолаҕа тиэтэтэр. Эбэм күөрчэх ытыйар, Аҕам хаһыат арыйар, Сарсыардааҥы кэпсэтии, Сарсыҥҥыны кэтэһии... Оҕо сааһым иннибэр Ойуоккалаан бу тиллэр, Күннээх кэми санатар, Күлэн-үөрэн чаҕаарар. Халлаан өҥө ып-ыраас, Күммүт уота сып-сылаас, Тула өттүм сып-сырдык, Дьоллоох этим, дьэ, кырдьык! Оҕо сааспар тириэрдэр Орох суолум тыргыллар, Кэрэ кэпсээн салҕанар, Кинигэҕэ тиһиллэр!.. ... Ааспыт кэми санааммын Аргыый үөһэ тыынабын, Аптаах ааммар төннөбүн, Ааммын аргыый сабабын... (СыкКыС, 06.10.2017)