Поскачин В.С.

[02.10, 10:54] Бэҕэһээ Алтынньы -Хотой Айыы ыйа саҕаланыытыгар аатырбыт "Чолбон" туһунан киинэни көрөн баран, бэйэм санаабын үллэстэргэ сананным. "Чолбон" бөлөх тэриллибитэ быйыл 39 сыла эбит. Ол сыллар усталаах-туоратыгар киһи ааҕан сиппэт төһөлөөх араас уларыйыылар, өрө-таҥнары тутуулар буоллулар?! Ол тухары, эп-эдэр эрдэхтэриттэн, биир сүнньүнү тутуһан, туохха да аралдьыйбакка, омукпут философиятын дириҥ ис хоһоонун дьоҥҥо иҥэрэр, киэн туттар санааны саҕар сыаллаах үлэлээбиттэрэ киһини долгутар, сөхтөрөр. Хас биирдии киһи түгэх өбүгэбититтэн кэлбит омукпут тыынын, түҥ былыргыттан иитиэхтии сылдьар көҥүл санаабытын, киһи олорорун тухары төрөөбүт төрүт дойдутугар бэриниилээх, Аар Айылҕабытыгар, Үрдүк Айыыларбытыгар күүстээх итэҕэллээх, тылбыт баайын бэйэҕэ иҥэрэн, бэйэ инникитигэр эрэллээх, кэскили түстүүр санаалаах сылдьыахтааҕын ырыа нөҥүө хайдах курдук этэн-тыынан кэлбиттэрин көрөммүн олус да астынным. Киинэ уонтан тахса сылы быһа таҥыллан-таҥыллан, сааһыланан-сааһыланан бу билигин тахсыбыта бэйэтэ туспа ыйаахтаах эбит диэн түмүккэ кэллим. Омук быһыытынан "киһи буолабыт дуу,кии буолабыт дуу?" диэн түгэхтээх ис хоһоону көрдүм. Өбүгэбит барахсан хаалларбыт сүдү бэлэҕин - мындырбытын, муудараспытын, баай тылбытын, олох-дьаһах тэринэр үгэспитин барытын ХАЙДАХ гынан харах харатын курдук харыстыыбыт диэн барыбытыгар улахан ыйытыы турда. Кэлэр кэнчээри ыччаппыт инникитин туһугар, кулуттуу санааны кый быраҕыаҕыҥ, ньылаҥнаһан-хаптаҥнаһан бүтүөҕүҥ, кэскилбит туһугар бэйэбит эрэ эппиэккэ турарбытын өйдүүр кэм кэллэ! Бу курдук туох да аакка-суолга, наҕараадаҕа, наадыйбакка, үп-хамнас эрэйбэккэ, инники кэскилбитин түстүү сылдьар Улуу Дьоммутун көрдөрөн, холобур оҥорон, эдэр ыччаппытын хантан хааннаахтарынан, кимтэн кииннээхтэринэн киэн тутта сылдьалларын ситиһиэҕиҥ! Эдэр ыччат тоҕуоруһа кэлиҥ, көрүҥ, аҕа саастаах дьоҥҥут тугу этэрин истиҥ, өйдүү, искитигэр иһийэн-иһиллэнэн, " Мин кимминий?" диэн бэйэҕэ сөптөөх ыйытыы туруоран, инникигитин сөпкө түстэниҥ диэн ыҥырабын. Киинэни айан-тутан таһаарбыт эдэр ааптардарга биһигиттэн-аҕа саастаах көлүөнэттэн, махтал бастыҥа буоллун! Барыбыт Инникибитигэр барыта Үтүө буоллун! 🙌🏻🙌🏻🙌🏻🙏🏻🙏🏻🙏🏻 [02.10, 10:54] Манна даҕатан, уһун да кылгас да айаннаах таксистарга баҕа санаабын тиэрдэбин. Эһиги айаҥҥытыгар туттар муусукаҕытын таларгытыгар эппиэтинэс баар буолуохтаах. Ол тыаһыы турар муусукаҕытын бэйэҕит эрэ истэр буолбатаххыт. Бастакы уочарат, олорсон иһэр дьон истэр. 8-10 чааһы быһа туох да ис хоһооно суох ИИ таҥмыт ньуу-ньаа ырыаларын холбообокко, бу Чолбон, Аскаллон Павлов, Никииппэр Сэмэнэп ырыаларын иһитиннэриҥ. Дьон олорон эрэ дьиҥ ис хоһоонноох ырыаны истэн бэйэтин омук быһыытынан ылынарыгар эһиги ити дьайыыгыт олус суолталаах буоларын өйдөөҥ! Из сети ватсап.