Поскачин В.С.

Мин оҕо эрдэхпинэ Үөһээ Бүлүү дьоно куорат Бүлүүгэ баран кэлэллэрин биир тылынан - куораттаатым, куораттан кэллим дииллэр этэ. Биирдэ, Дүллүкүгэ олорор эрдэхпитинэ, эбэм миигин куорат Бүлүүгэ ыалдьыттыы барарыгар илдьэ барбыта. Саҥа Аппа диэн причалтан "Заря" теплоходунан начаас устан тиийбиппит. Онно Дарья диэн эдьиийбэр ыалдьыттаабыппыт. Кинилэр олорор сирдэриттэн чугас куорат паарката баар этэ. Мин оҕолору батыһан тиийэн күнү быһа онно оонньообутум, үчүгэй баҕайы оҥоһуулаах качель баарын өйдүүбүн. Арааһа үйэбэр бастакы оннук качель баарын көрбүт буолуохтаахпын. Биһиэхэ көннөрү быаны ыйаан кэбиһэр этилэр, онно хаптаһын булан олордо-олордо хачыаллааччыбыт. Уонна уулуссалара ырааһын, киэҥин эмиэ бэлиэтии көрбүтүм. Дьиэлэрэ улаханын-маанытын. Кэнники, улаатан баран куорат Бүлүү дьонун менталитета, туттуулара-хаптыылара дьиҥ куораттыы эбит диэн өйдөөбүтүм. Бүлүү округун столицата буолан олорбут, сахалар алаас-алааһынан бытарыйан олорор кэммитигэр тыа дьонугар дьиҥнээх куорат уонна государственнай былаас органнара барыта баар буолан оннук. Бүлүү куората кэнники кэмҥэ сүрдээҕин сайынна. Мин манна биири этиэхпин баҕарабын - чааһынай маҕаһыыннара хара маҥнайгыттан анаан-минээн куораты киэргэтэр курдук тутуллан барбыттарын. Бу маннык ытыктабыллаах, тапталлаах сыһыан баарын тухары куорат Бүлүү өссө да сайда, улаата, кыаҕыра туруоҕа. Саха куораттыы олоруутун культурата саҕаламмыт сирэ, бастакыннан сахатыйбыт буолан. Бүлүү куората - саха бастакы куората. Ким да бу этиибин утарбат ини.