Поскачин В.С.

Мин бу кэнники олорон биири толкуйдаатым. Тоҕо депутаттарбыт, Ил Түмэн буоллун, Госдума буоллун өрүү норуоту кыбытар, кыһарыйар, атаҕастыыр законнары ылына олороллоруй диэн. Онтон биир чопчу санааҕа кэллим. Урут сэбиэскэй былаас саҕана норуот уонна оччотооҕу тойотторбут-партноменклатура диэн чопчу арахсыы баара. Номенклатура туспа маҕаһыыннааҕа, туспа хааччыллыылааҕа, туспа курортааҕа. Бастакыннан үчүгэй дьиэннэн хааччыллар этэ. Ити курдук икки тус-туһунан маркстыы-лениннии эттэххэ тус-туспа класс үөскээн олорбута. Оччотооҕуга дьон өйүн сүүйээри, пропагандаҕа анаан биир эмит доярканы, тракториһы эмискэччи Верховнай Совет депутатынан "талан", дьиҥинэн анаан соһуталлара. Ол гынан баран баһыйар үгүс депутат эмиэ ол партократтартан турар этэ. Ол дьонтон сорохторо киһи быһыытынан чаҕылхай, ис дууһаларынан дьоннорун-норуоттарын туһугар кыһаллар, аһаҕастык киирсэр этилэр. Мин холобурун Климент Иванову, Макар Яковлевы ааттаталыам этэ. Өссө да баар этилэр, аҕыйах да буоллар. Мин итини тоҕо аҕынным диир буоллахха бу билиҥҥи ЕР партия урукку КПСС саамай куһаҕан өрүттэрин хатылаан эрэр. Бу системообразующай партиябыт эмиэ урукку эстэн эрэр КПСС суолун хатылаабыта дьиҥинэн ыраатта. Кадровай да өттүн ылан көрдөххө оннук. Билигин киирсэ сылдьар кандидаттары ырытан көрөбүн уонна маннык араартыыбын: чиновник-бюрократ дуу, боростуой норуот киһитэ дуу диэн. Бюрократ бастакы уочарат кумаахы уонна отчет киһитэ. Кинилэргэ били нуучча поговоркатын курдук: "без бумажки ты букашка". Бастакы уочарат дөкүмүөн, заявление, быһаарыы, ол кэнниттэн дьэ тус киһи сирэйэ көстөн кэлэр. Дьону дьон курдук көрбөт, көннөрү "винтик" дуу "шарнир" дуу курдук көрөр дьон, ити бюрократтар үксүлэрэ. Бу маннык толкуйдаан көрдөххө Госдумаҕа ити курдук партократ-бюрократ буолбатах үс эрэ киһи баар: Заморщикова, Ю Владимир уонна Ноговицын. Бу дьон көннөрү дьону кытта тэҥҥэ кэпсэтэр, өйдөһөр, быһаарсар кыахтаахтар. Тойон иннигэр "навытяжку" турар, тойоҥҥо эрэ бэрт буола сатыыр дьон буолбатахтар, норуот дьоно. Бу үс киһиттэн кыайар кыахтаах саха далбар хотунун Заморщикова Ньургуйаананы талыҥ диэн агитациялыыбын. Уонна ол партиятыгар наадыйымаҥ, партия туһа туспа, киһи туһа туспа. Бу маннык, Ньургуйаана курдук эрэ дьоҥҥо эмпатия, дьону аһыныы, тус кыһалҕаны өйдөөһүн, быһаарсааһын баар буолар. Ону умнумаҥ. Уонна үс сыл бииргэ депутаттааммын кини боевой характердааҕын көрдүм, биллим. Онон киһи быһыытынан убаастыыбын, мин хорсун быһыыны хас биирдии киһи курдук сүрдээҕин сыаналыыбын. Бэйэтэ бизнесвумен, үлэ бөҕөтө көрсөн тэрийбит тэрилтэтин туһугар диэн баран хайҕаан кэбиһэ-кэбиһэ былаастан харчы бытархайдаһа сылдьыа эбитэ буолуо. Атын киһи эбитэ буоллар. Ону бу кини курдук справедливость туһа диэн баран сылдьар дьон оннук буолбаттар. Ону бу билигин даҕаны дакаастыы сылдьар. Онтон Үөһээ Бүлүү-Горнай округуттан депутаттыы сылдьыбыт буоламмын мин эмиэ бэйэм көрүүлэрдээхпин. Ити Долгунов Николай диэн таһымнаах киһи буолан син кыахтаах, орто бааннарга киирсэр "Алмазэргиэнбанк" тойоно. Ол гынан баран миигин үс сылы быһа сойуолаһан баран бүтэр уһугар сымыйа сылтах булан дьиэбэр суох кэммэр оҥорбут дьэҥдьиирдэригэр булбут аҕыйах патронтан уголовнай дьыала тэрийэн, сууттаан депутаппыттан уһултарбыт Айсен Николаев "Единай Россия" партията туруорбут киһитэ. Мин онон хайдах даҕаны кинини өйүүр кыаҕым суох. Били этэллэрин курдук "күлэ-күлэ күлбүн таптайбыт" курдук сананыаҕа, Айсен Николаев. Туох үчүгэйи оҥорбутун иһин ити киһини баччааҥҥа диэри үөһээ бүлүүлэр өрө тута сатыылларын отой өйдөөбөппүн. Онон мин бу сырыыга Владимир Скрыбыкины өйөөҥ диэн ыҥырабын, сүрдээх элэккэй, боростуой дьон интэриэһин өйдүүр, өйүүр киһи. Уонна атын улуус диэн атыҥырыа суохтаахпыт, бастакытынан САХАЛАР диэн баран сылдьар дьон буоллахпыт. Уонна ити киһи талылыннаҕына икки тус-туспа округка араарарга күүскэ үлэлэһиэхпит. Үөһээ Бүлүүгэ аттынааҕы Ньурбаттан, Бүлүүттэн аҕыйах нэһилиэги эбэн биэрэн, Горнайга куораттан, Намтан бэриһиннэрэн. Мин бэйэм историябын үөһээ бүлүүлэр бары бэккэ билэҕит. Мин хаһан даҕаны салайар дуоһунаска ананан үлэлээбэтэҕим. Сельпоҕа грузчиктаабытым, лесоохранаҕа бастаан десантниктаабытым, онтон парашютистаабытым, армияҕа барыахпар диэри. Онтон бухгалтерынан үлэлээбитим. Ол кэнниттэн барыта бэйэм тэрийбит тэрилтэлэрбин салайбытым. Ама да 18 сыл баһылыктаабытым иһин миигин ол дуоһунаска ким да тустаах киһи анаабатаҕа, эһиги, Үөһээ Бүлүү норуота миигин талбыккыт, анаабыккыт. Ол иһин мин хаһан даҕаны бэйэбин тойон-бюрократ курдук санамматаҕым даҕаны, оннук быһыыламматаҕым даҕаны. Дьиҥ норуот уола буоллаҕым. Онон мин тыыннааҕым тухары эһиэхэ өрүү махталлаахпын. Онон тапталлаах үөһээ бүлүүлэрим бу да сырыыга уолгут этэрин истиҥ, өйөөҥ! Үс бюллетень биэриэхтэрэ: 1. Партийнай список, Госдума, онно хайаан даҕаны КПРФ. ЕР партияны кытта тэҥҥэ дайбаһар кыахтааҕын иһин. 2. Одномандатнай, Госдума. Манна Ньургуйаана Заморщикованы, саамай бэлэмнээх уонна норуот диэкки санаалаах диэн. 3. Үөһээ Бүлүү-Горнай округа. Ил Түмэн. Манна Владимир Скрыбыкины, мин этэр этиилэрбин олохтоох бэйэни салайыныыга даҕаны, үбү-харчыны быһа нэһилиэктэргэ бэйэлэригэр тиэрдиэххэ диирбин өйүүрүн уонна Айсен Николаев ыытар сыыһа политикатын утары этэрин иһин. Ытыктабылы кытта, Владимир Поскачин.