Поскачин В.С.

Никита ТИМОФЕЕВ, бэлиитик: “Билиҥҥи кэмҥэ депутат оруола күүскэ уларыйан турар. Бастатан туран, депутат тутулуга суох буолуохтаах. Кини тэрилтэ салайааччыта, бүддьүөт үлэһитэ буоллаҕына бэйэтин санаатын, баҕарбытын да иһин, кыайан этинэр кыаҕа суох буолар. Баҕатын хоту кыайан куоластаабат. Маннык депутат норуот интэриэһин көмүскүүрэ уустук. Билиҥҥи туругунан Ил Түмэҥҥэ 70 депутаттан 80 % -на тэрилтэ салайааччылара, бюджет үлэһиттэрэ. Тутулуга суох депутат ахсаана быдан кыра. Холобур, НОВЫЕ ЛЮДИ фракция депутаттара бары тутулуга суох депутаттар, ол иһин санааларын этинэр, аһаҕастык туруорсар, баҕаларын хоту куоластыыр кыахтаахтар. Парламеҥҥа баһыйар ахсааннаах былаас партията биир тэҥ куоластааһыны ирдиир, тутуһар буоллаҕына, биһиги бэйэбит сүрэхпит-суобаспыт туох дииринэн куоластыырбыт көҥүл. Ол иһин, биһиги тутулуга суох депутаттар ахсааннарын элбэтэ сатыахтаахпыт. Тоҕо? Биһиги утары куоластаабыппытын да иһин, Конституцияны уларытааһын, бэйэ салайыныы да боппуруостара буоллуннар, баһылыктары сирэй талыы да буоллун - бу барыта баһыйар куоластааһын түмүгүнэн олоххо киирэн турар. Олохпут тутула уларыйда, уустугурда. Ол эрэн, билигин даҕаны республика таһымыгар сүрдээх тыын боппуруостар тураллар. Тыа хаһаайыстыбатын харчыта кыччаата, ЖКХ-ҕа үп ситэри көрүллүбэт, үөрэҕириигэ оптимизация бара турар, эмп харчыта тиийбэт. Бу боппуруостары туруорсарга тутулуга суох депутаттар наадалар. Тутулуктаах депутат тугу да аһаҕастык этэр кыаҕа суох, былаас партията сыыһа дьаһанан олорор диэ дуу, правительство бюджеты баҕарбытынан уларыта олорор диэ дуу. Биллэн турар, кини этинэр, туруорсар кыаҕа суох. Иккиһинэн, билигин депутат оруола уларыйан турар. Депутат полномочията үрдээтэ. Урут кини бу эбийиэги туттарыам, онно көмөлөһүөм, манна харчы көрдөрүөм диир буоллаҕына, билигин оннук этэр кыаҕа суох. Мин бэйэм бюджетнай кэмитиэккэ баарбын. Бюджет харчыта тиийбэт. Номнуо иккис сылын саҥа эбийиэк тутуута биир да киирбэккэ турар уонна киириэ да суоҕа. Социальнай программаларга, бюджет үлэһиттэрин да хамнастарыгар харчы тиийбэт. Онон, депутаттар тугу да мэктиэлиир кыахтара суох. Ол да буоллар, сокуон уларыйан, билигин нэһилиэк, оройуон депутаттара баһылыгы талар буоллулар. Сүрдээх эппиэтинэстээх полномочие кинилэргэ сүктэрилиннэ. Төһөнөн депутат тутулуга суох буолар да, соччонон хааччаҕа, сабыдыала суох этинэр, туруорсар кыахтанар. Үөһэттэн соҥноммут киһини баһылык оҥорон, олохтоохторун дьылҕатын туттарар ду, дьиҥ-чахчы үлэһит, эрэллээх киһини талар ду. Барыта депутат эппиэтинэһэ буолар. Үсүһүнэн, бу депутаттарбыт үлэлэрин, сөптөөх быһаарыныы ыларга көмө-өйөбүл буолар Ил Тумэн депутаттара. Саҥа сокуону ылыныы, баар сокуону олох ирдэбилинэн, Сахабыт сирин уратыларын учуоттаан көннөрөн-сааһылаан биэрии кинилэргэ сүктэриллэр. Манна туруорсар, этинэр-ирдэһэр, баары баарынан аһаҕастык этэр, тутулуга суох дьон наада. Бу кэлээри турар быыбарга Үөһээ Бүлүү уонна Горнай быыбардыыр уокуругуттан Ил Түмэҥҥэ 4 кандидат турда-Единай Россияттан Николай Долгунов, Новые люди партияттан - Владимир Скрыбыкин, КПРФ-тан Дмитрий Петров, Сиэрдээх Россияттан - Анатолий Лю-фа. Мин билиҥҥи туругу маннык көрөбүн, балартан Долгунов уонна Скрыбыкин дьиҥнээх агитация чэрчитинэн үлэлии сылдьаллар. Икки сүрүн кандидат буолаллара көстөр. Долгунов Үөһээ Бүлүүттэн төрүттээх, Скрыбыкин - Горнай, ону таһынан Үөһээ Бүлүүгэ үөрэммит, элбэх доҕоттордоох. Күн бүгүн быыбар буолара 10 күн хаалла. Лю-фа да, Петров да улуустар нэһилиэктэрин кэрийбэтилэр, бэйэлэрин программаларын дьоҥҥо билиһиннэрбэтилэр. Бу тугу көрдөрөрүй? Депутакка турунар күүстээх санаалара суоҕун, партияттан кандидат баар эрэ буоллун диэн ирдэбилтэн турунууну. Скрыбыкин Үөһээ Бүлүү дьонун-сэргэтин убаастаан, улуус нэһилиэктэригэр барытыгар сырытта, саамай ыраах Туобуйаҕа эрэ сатаан тиийбэтэ. Дьону кытта көрсөн, санаатын этинэн, туруорсар барылларын билиһиннэрэн кэллэ. Горнай улууһун нэһилиэктэрин иккистээн кэрийэ сылдьар. Сыалын ситиһэр күүстээх санаалаах кандидат оннук буолуохтаах. Аны Владимир Скрыбыкины Поскачин өйөөн-алгыстаан ыыппыта, норуокка биллэр эдэр кэскиллээх уолбут, тыа хаһаайыстыбатын сайдыытыгар үгүһү ыраҥалыыр, токуйдуур, оруннаах көрүүлээх Масаха Мэхээс өйүүрүн биллэрбитэ. Онон, Скрыбыкин кыайыыга улахан шанстаах. Биллэн турар, былаас партията туох баар административнай күүһү киллэрэн туран, бэйэлэрин кандидаттарын Долгунову агитациялыыллара биллэр. Кинилэргэ өссө биир "ээх" диир, барыларын кытта тэбис-тэҥҥэ кнопканы баттыыр киһи наада. Биһиги толкуйдуох тустаахпыт, Владимир Степанович Скрыбыкин өссө биир тутулуга суох депутат буолар кыахтаах. Сиргэ үлэлээбит практик, улахан уопуттаах, муниципальнай таһымы ис сүрэҕинэн, эт хаанынан баһылыктаабыт да киһи быһыытынан, бэйэ салайыныы департаменыгар үлэлээбит да буолан, үчүгэйдик билэр. Билигин Горнай улууһун депутатынан үлэлии сылдьар, онон улуус кыһалҕаларын толору билэн олорор. Ил Түмэн таһымыгар бэлэм депутат диэн мин көрөбүн. Судаарыстыбаннай тутулу, систиэмэни, бюджеты ис иһиттэн билэр. Финансист быһыытынан ааҕар-суоттуур. Күүстээх аналитик, стратегическай көрүүлээх политик. Аһаҕастык туруорсар, этинэр кыахтаах. Түмүккэ, биир дойдулаахтарбын, Горнайдары ыҥырыам этэ. Төһө да уолаттарбытын убаастаабыппытын иһин, куолас хайыппакка, үлэлиир, туруорсар кыахтаах кандидаты Скрыбыкины талыахха наада. Тыа дьоно үйэҕэ дириҥ толкуйдаах, туһалааҕы энчирэппэккэ талар ис иһиттэн дьоһуннаах көрүүлээх буолаллара. Онон сыыстарымыаҕыҥ, сөптөөх быһаарыыны ылыаҕыҥ”.