Ныбджэгъу лъапIэхэр! Адыгабзэмрэ тхыбзэмрэ ямафэкIэ сышъуфэгушIо! Адыгэ Республикэм икультурэ зэрэбаир, тятэжъ пIашъэхэм якIэн тызэрэрыгушхорэр мы мэфэкIым къеушыхьаты. ЛIэужхэр зэзыпхырэ, лъэпкъым итарихъ къэзыухъумэрэ бзэр ары шэн-хабзэхэмрэ зыкIыныгъэмрэ алъапсэу щытыр. Тарихъ шIэжьым ар изехьакIу, лъэпкъ хабзэхэр лIэужыкIэхэм алъыгъэIэсыжьыгъэнхэм фэIорышIэ. Ныдэлъфыбзэм икъэухъумэн хэтрэ лъэпкъкIи мэхьанэшхо зиIэ пшъэрылъэу щыт. Адыгабзэр нахь зэлъягъэшIэгъэным пае гъэсэныгъэм, шIэныгъэм, культурэм алъэныкъо Iофышхо щызэшIуахы. ЕджапIэхэм, кIэлэцIыкIу IыгъыпIэхэм фольклор Iофтхьабзэхэр, зэнэкъокъухэр, олимпиадэхэр зэхащэх, лекциехэм къяджэх, творческэ зэIукIэгъухэр тхакIохэм, усакIохэм, шIэныгъэлэжьхэм адыряIэх. ТапэкIи мыщ фэдэ Iофтхьабзэхэм зягъэушъомбгъугъэным, ныдэлъфыбзэм икъэухъумэн ныбжьыкIэхэр нахь чанэу къыхэгъэлэжьэгъэнхэм, тикультурэ кIэнэу ыкIи республикэм къэралыгъуабзэу щыт адыгабзэм хэхъоныгъэ ышIынымкIэ ищыкIэгъэ амалхэр зехьэгъэнхэм мэхьанэшхо иI. Мыщ унагъохэми яIахьышхо хэлъынэу щыт. Тыбзэ дахэу адыгабзэр къэтыухъумэным пае тапэкIи тызэгъусэу тфэлъэкIыщтыр зэкIэ тэжъугъашIэ! 📲 МАХ-м узэрэкIэтхэщтыр