Непэ Адыгэкъалэ мэхьанэшхо зиIэ Iофтхьабзэ щыкIуагъ – НэкIмэзэ лъапIэм ипэгъокIэу мэщыт дахэ къыщызэIуахыгъ! Сигуапэу мы тарихъ хъугъэ-шIагъэм сыхэлэжьагъ Адыгеим ирайонхэм зэкIэми, Краснодар краим, Къэрэщэе-Щэрджэсым, Къэбэртэе-Бэлъкъарым, Ингушетием, къэралыгъом инэмыкI шъолъырхэм къарыкIыгъэ хьакIэхэм ыкIи тхьэшIошъхъуныгъэ зиIэ нэбгырэ мин пчъагъэмэ саригъусэу. Мы псэолъэ дэхэ дэдэу унэшъхьэ шыгу хъурэешхомрэ азэнэджэпIэ псыгъохэмрэ зышъхьэщытхэр быслъымэнхэм лъытэныгъэ зыфашIырэ закъоу щытэп, ар къалэм иархитектурнэ чIыпIэ дахэ хъугъэ. Адыгэкъалэ ыкIи тиреспубликэ зэрэпсаоу ащыпсэухэрэм ацIэкIэ сирэзэныгъэ фэсэгъазэ шIушIакIоу, зимылъкукIэ мэщытыр языгъэшIыгъэ Сихъу Нарт. Шъолъырым ихэхъоныгъэ иIахь къызэрэхилъхьагъэм, социальнэ институтхэм ягъэпытэн, дин зэфэшъхьафхэм язэпхыныгъэ зэрадэлэжьагъэм апае Сихъу Нарт республикэм итын анахь лъагэ - бгъэхалъхьэу «Адыгеим и Щытхъузехь» зыфиIорэм изехьакIо хъугъэ. Сицыхьэ телъ гушъхьэбаиныгъэ гупчакIэм джырэ мэщытэу чIыпIэр зыщимыкъущтыгъэм иIофыгъо зэрэдигъэзыжьыщтым имызакъоу, быслъымэнхэм шIэныгъэ зыщызэрагъэгъотыщт ыкIи шIушIэным къыфэзыщэщтхэ чIыпIэу зэрэхъущтым. Мыщ фэдэ гупчэ пэпчъ джыри зэ къегъэшъыпкъэжьы хабзэм тет ислъамыр лъэпкъыбэ хъурэ тикъэралыгъо игушъхьэ ыкIи игъэпсэкIо щыIэныгъэ хэпчын умылъэкIыщт изы Iахьэу зэрэщытыр. Адыгеим тыфэсакъызэ къыщытэухъумэ цIыф лъэпкъ ыкIи дин зэфэшъхьафхэм азыфагу лъытэныгъэу илъыр. Сицыхьэ телъ аущтэу сыдигъокIи зэрэщытыщтым. Тэ талъэныкъокIэ лъыдгъэкIотэщт диныр зыIыгъхэм ящыкIагъэхэр агъотынхэмкIэ, тхьэлъэIупIэхэм яшIынкIэ ыкIи дин мэфэкIхэм язэхэщэнкIэ Iофыгъохэм язехьан. 📲 МАХ-м узэрэкIэтхэщтыр