Республикэм иобщественнэ движениеу «Адыгэ Хасэм» ия XXIII-рэ зэфэхьысыжь-хэдзын зэфэс непэ сыхэлэжьагъ. Адыгэ Хасэр – тишъолъыр анахь мэхьанэ зыщыриIэ иобщественнэ организаций. Тиреспублики, зэрэкъэралыгъуи лъэпкъхэмрэ динхэмрэ азыфагу зэзэгъыныгъэу арылъыр ылъапсэу хэхъоныгъэ ашIы, ар тикъэралыгъо ыкIочIэ шъхьаI. Адыгеим ис лъэпкъхэм языкIыныгъэ Хасэм къеухъумэ, адыгабзэмрэ адыгэ культурэмрэ якъызэтегъэнэн епхыгъэ Iофыгъохэр шIуагъэ хэлъэу зэшIуехых, IэкIыбым ис тилъэпкъэгъухэм зэпхыныгъэ адыриI, къэзыгъэзэжьыгъэхэм яIэпыIэгъу. Президентэу Владимир Путиным Урысыем ис лъэпкъхэм языкIыныгъэ и Илъэсэу ыгъэнэфагъэм ипшъэрылъхэм анэсыгъэным ащкIэ занкIэу иIахь къыхелъхьэ. Сафэраз мэхьанэшхо зиIэ Iофэу зэрахьэрэмкIэ! Непэрэ зэфэсым илIыкIохэм Советым хэхьащтхэм амакъэхэр афатыгъэх, ахэм «Адыгэ Хасэм» итхьаматэу ЛIымыщэкъо Рэмэзан илъэсищ пIалъэкIэ хадзыжьыгъ. СыфэгушIо Рэмэзан цыхьэу къыфашIыгъэмкIэ ыкIи тапэкIэ Iофэу ышIэщтым гъэхъагъэхэр щишIынхэу сыфэлъаIо! Мэхьанэшхо иIэу сэлъытэ общественнэ движением ригъэжьэгъэ Iофыгъохэу адыгабзэмрэ адыгэ культурэмрэ якъызэтегъэнэн, адыгэ хабзэр жъугъэу ахэлъхьэгъэным, ныбжьыкIэхэр гъэпсын Iофыгъохэм ахэщэгъэнхэм атегъэпсыхьагъэхэр лъигъэкIотэнхэм. Шъхьафэу Адыгэ Хасэм хэтхэм анаIэ зытрагъэтын фаехэр: къэхъухэрэм япчъагъэ хэгъэхъогъэныр, гушъхьэ-намыс пIуныгъэ ныбжьыкIэхэм ахэлъхьэгъэныр, хэушъхьафыкIыгъэ дзэ операцием хэлэжьэрэ дзэкIолIхэм IэпыIэгъу ягъэгъотыгъэныр, Адыгеим мамырныгъэмрэ зэзэгъыныгъэмрэ щыухъумэгъэнхэр. Сицыхьэ телъ зэпэщэчыгъэ унашъохэу Адыгэ Хасэм ипащэхэмрэ ащ хэтхэмрэ ашIыхэрэр, ыпэкIи зэрэщытыгъэу, шъолъырым хэхъоныгъэ ышIыным, щыIэкIэшIу илъыным, зиужьыным яIахьышIоу зэрэщытыщтхэм! 📲 МАХ-м узэрэкIэтхэщтыр