Таатта дьоно наһаа да сэмэйдэр, сырдыктар! Бэҕэһээ Баайаҕаҕа «Iron» бренд хампаанньа тэрийээччитэ Макар Зырянов, дириэктэр уонна маркетолог буолан баран, сүргэбит көтөҕүллэн, дуоһуйан кэллибит. Манна биһиги улуу маастар Мандар Уус үлэлэрин кытта билсэн, чинчийэн, үөрэтэн саҕалыыры оносто сылдьабыт. Бу уопсай коллаборацияны Баайаҕа эдэр, кэскиллээх главата Александр Романович саҕалаата. Кини аҕата Роман Романович Романов Баайаҕаҕа элбэх тутууну ыыппыт, Мандар Уус аатын үйэтиппит — уһун сылларга главанан таһаарыылаахтык үлэлээбит ытык киһи буолар. Биһиги бары эһигини кытта — улуу маастар киэҥ хабааннаах үлэлэрин тарҕатар, сахалыы тыыны өрө тутар, айар-тутар эдэр ыччат буолуохпутун наада. Быйыл сайын «Баайаҕаҕа бара сылдьыаххын наада» диэн элбэх этии киирбитэ, ити барыта мээнэҕэ буолбатах, бэлиэ курдук ылыммытым. Нэһилиэккэ маастар философскай уруһуйдарын көрдөрөн билиһиннэрдилэр. Кэлэн иһэн уһун айанна утуйан ыллахпына, ол уруһуйдар харахпар хамсыы сылдьар курдуктар, тимир куйахтаах боотурдар көстөллөр, сирэйим анара утуйан хаалла. Дьэ дьикти. Ити — омук тыыннаах хаалар албаһа.