مسکو او کابل نږدې کېږي، کابل او اسلاماباد د ټکر پر لور: د مسکو فارمت له ګډې پایلنۍ اعلامیې پرته پای ته ورسېد لیکوال: «زما روایت» د اکتوبر په ۵مه په مسکو کې د افغانستان په اړه د مسکو فارمت د مشورتي ناستو اتمه غونډه ترسره شوه. دا غونډه داسې مهال جوړه شوه چې د کابل او اسلاماباد اړیکې په بېسارې توګه ترینګلې شوې دي. ناستې په ورته وخت کې دوه مهم تمایلات هم روښانه کړل: له اوسنیو افغان چارواکو سره د روسیې د اړیکو لا پیاوړتیا او د افغانستان ـ پاکستان شخړې په سیمهییز امنیت کې د یوه مهم عامل په توګه راڅرګندېدل. په غونډه کې د افغانستان، روسیې، ایران، هند، چین، پاکستان، قزاقستان، قرغزستان، تاجکستان او اوزبیکستان استازو ګډون کړی و. د بېلاروس او مصر پلاوي د مېلمنو په توګه بلل شوي وو. مسکو له کابل سره همکاري پیاوړې کوي د غونډې پر مهال سیرګئي لاوروف د اوسنیو افغان چارواکو د فعالیتونوپه اړه په ټولیز ډول مثبت نظر څرګند کړ. د هغه په وینا، د طالبانو حکومت د هېواد پر ډېره برخه کنټرول لري او، لکه څنګه چې هغه وویل، هېواد په کافي بریالیتوب سره اداره کوي. د روسیې د بهرنیو چارو وزیر هم د ترهګرو ډلو پر وړاندې د افغان چارواکو