12 წლის წინ გაუჩინარებული გურამ დადიანიძის ოჯახის წევრები შსს-სთან აქციას მართავენ და საქმის სწრაფ გამოძიებას მოითხოვენ. აქციას შეუერთდნენ ბიჭის მამა და მამიდა. „12 წელი ტანჯვა-წამებით ვიცხოვრე, ვეძებდი ერთადერთ დაკარგულ შვილს. მაგრამ 12 წლის განმავლობაში გამოძიებამ არაფერი გამიკეთა“, — განაცხადა გურამ დადიანიძის დედამ, სოფო ბიბილაშვილმა. 17 წლის გურამ დადიანიძე 2014 წელს დუშეთის რაიონის სოფელ ქვემო მლეთაში, ლომისობის დღესასწაულზე ექსკურსიის დროს გაუჩინარდა. მისი კვალი დღემდე ვერ იპოვეს. ოჯახის მოთხოვნით, საქმე თბილისის პოლიციას უკვე გადაეცა.