Zayniddin Tojiyev: "Yoshlar shunday o‘yinlar orqali katta futbolga tayyorlanib boradi" Proliga 22-turidan o‘rin olgan "QMU Jayxun" – "Gʻazalkent" uchrashuvidan so‘ng jamoamiz bosh murabbiyi Zayniddin Tojiyev matbuot anjumanida ishtirok etdi. - O‘yin haqida fikringiz… - Chiroyli o‘yin guvohi bo‘ldik. Uchrashuv yangi stadionda o‘tkazildi va bu ham muxlislarga ma’qul keldi. Bahsning ayniqsa ikkinchi bo‘limi qiziq tus oldi, har ikki tomonga hujumlar yog‘dirildi. Shu bois futbolchilarimiz juda ko‘p kuch yo‘qotishdi. Bundan avvalgi o‘yinlarda yakkarashuvlarni boy berib konsentratsiyani yo‘qotib qo‘yayotgandik, lekin bugun ancha o‘zimizga kelib olganimiz ko‘rindi. Afsuski, o‘tkazib yuborilgan golda yana to‘p nazoratini yo‘qotib qo‘ydik. Bu kabi xatolarni to‘g‘rilashga harakat qilamiz. Bugungi g‘alaba va o‘yin uchun yigitlardan minnatdorman, jamoamiz yosh, o‘yindan o‘yinga o‘sish bor. Xatolarimiz juda ko‘p, sekin-asta kamayib boradi deb o‘ylayman. Yoshlar shunday o‘yinlar orqali katta futbolga tayyorlanib boradi. Biz har bir bahsda yutuqni ko‘zlab maydonga tushamiz. Mag‘lubiyatga uchrasak bu katta muammo emas, ammo yoshlarni g‘alabalar orqali katta futbolga o‘rgatmoqchimiz. 📷 gazalkent_fc ✈️ @gazalkent_fc