#ЕвангелиеДня И́же лю́битъ отцá или́ мáтерь пáче менé, нѣ́сть менé достóинъ: и и́же лю́битъ сы́на или́ дщéрь пáче менé, нѣ́сть менé достóинъ: и и́же не прiи́метъ крестá своегó и вслѣ́дъ менé грядéтъ, нѣ́сть менé достóинъ. Обрѣты́й дýшу свою́ погуби́тъ ю́: а и́же погуби́тъ дýшу свою́ менé рáди, обря́щетъ ю́. И́же вáсъ прiéмлетъ, менé прiéмлетъ: и и́же прiéмлетъ менé, прiéмлетъ послáвшаго мя́: прiéмляй прорóка во и́мя прорóчо, мздý прорóчу прiи́метъ: и прiéмляй прáведника во и́мя прáведничо, мздý прáведничу прiи́метъ: и и́же áще напои́тъ еди́наго от мáлыхъ си́хъ чáшею студены́ воды́ тóкмо, во и́мя ученикá, ами́нь глагóлю вáмъ, не погуби́тъ мзды́ своея́. И бы́сть, егдá соверши́ Иисýсъ заповѣ́дая обѣманáдесяте ученикóма свои́ма, прéйде оттýду учи́ти и проповѣ́дати во градѣ́хъ и́хъ. От Матфея святое благовествование, глава 10:37-11:1