Международный день заикающихся людей Мин урут улаханнык кэлэҕэйдиир этим. Үгүс тылы сатаан саҥарбакка илиибинэн сапсынан көрдөрөрүм. Баҕар, тыла суох дьоҥҥо иитиллибиппиттэн буолуо. Ийэм үөрэнэр, аҕам үлэлиир буолан эбээлэх эһээбэр иитиллибитим. Эбэм Люция, эһэм Ариан Дяриковтар, биллэр иистэнньэҥ уонна унтуу улларар дьоннор этэ. Эбэм саҥарбат да, истибэт да (глухонемая) этэ, онон, дьиэҕэ үксүн илиинэн бары кэпсэтэрбит. Билигин даҕаны сорох тылларга барбах таттаран ылабын, саҥара туран эрдэттэн бу тылга кэлэҕэйдиирим буолуо диэн, атын солбук (синоним) тылы толкуйдаан уларытан биэрэбин. Тугу саҥарыахтаахпын толкуйдуурум таһынан, тэҥинэн солбук тыллары толкуйдуубун, туһугар эмиэ эрэй буолар, сороҕор эбэтэр түргэнник биир тыынынан барытын саҥаран кээһиэххэ наада😅 Сүрүн сүһүөх кылаастарга, эһээм суох буолтун кэннэ Хороҕо барбыппыт. Онно, билигин санаатахпына күлэбин, "Титаник" диэн киинэ кэлтэ, ыалтан кассета уларса бараары хас да күн бэлэмнэммитим, биир тылы сатаан саҥарбакка, тиийэн баран син биир: "Т-т-т-т-т, ити буо-буо-буо-лаҕына, Т-т-т" бүтэһигэр илиибинэн уста сылдьар хараабыл 🛳 көрдөрбүппэр өйдөөн уларсыбыттара🤣 Маннык эрэйдэнэрбин учууталым Бабаранова Евдокия Николаевна таба көрөн, ылсан, эрчийэн саҥаран баран тохтообот гына чочуйбута. Номнуо, улааппыт, "барыта хойутаан" диэбиккэ диэри, 9 кылаастан учууталым илиитигэр киирбитим. Ити барыта НПК көмөтүнэн, сатаан саҥарбат оҕону тугу сөбүлүүрбүн таба көрөн, дьону кытары сатаан атах тэпсэн олорон кэпсэппэт буоламмын, ыт доҕордооҕум, онтукпун күнү быһа бэрилиирим, салааска иилэн баран өрүстэн уу баһабыт, мас, муус таһаарабыт үлэбит ол. Ону таба көрөн, НПКаҕа "Ыт туһунан" дакылаат оҥоробут диэн буолла. Дьоммор кэлэн, өйдөтөн, дьонум өйөөн "Полароид" фотоаппарат ылан биэртэрэ, онон Хоро ытын барытын түһэрбитим, онтукаларбын өҥүнэн, боруоданан араартаан саҕалаабытым. Аны, саамай куттала, дьон иннигэр саҥарыы, бастаан, учууталым аҕыйах доҕотторум иннигэр саҥардарга үөрэппитэ, уруок кэннэ мин туспар хаалааччылар, онтон кылаас иннигэр, кылааһынньыктарбар махтанабын, биирдэ даҕаны сирэй-харах аспатахтара. Чэ, оннук, аудиториябын кэҥэтэн-кэҥэтэн үөрэнэр кэмнэрбэр "Шаг в будущее", о.д.а. республиканскай НПК кыайыылааҕа буолтум✅ Хоротооҕу учууталларым Евдокия Николаевна саха тыла, Нина Алексеевна нуучча тыла, кэлэҕэйдиир сатаан хоһоон нойосуус туттарбаккын, онон эйиэхэ биэрбэппит диэбэтэхтэрэ, хара маҥнайгыттан нойосууспун иннилэригэр олорон ыраас кумааҕыга суруйан туттарар этим. Билигин суруйан да баран, саҥаран да баран тохтообот буолбуппун😂 Хором учууталларыгар, дьоммор, кылааһынньыктарбар махтал❤️ Улааттахпына ким буоларбын номнуо билэр этим, сатаан саҥарбат оҕо уопсастыбаҕа киирэрэ уустук, онон эбээлээх, эһээбин батан унтуу улларан айахпын ииттэбин диэн. Ону, учууталларым, дьонум, доҕотторум миэхэ атын, улахан олоҕу бэлэхтээтилэр👍 Кэлэҕэй оҕолоргутун кытары дьарыктаныҥ, тугун эрэ таптаххытына барыта табыллыа🙌 Уонна НПКаны диэннэри наһаа убаастыыбын👍 Арба, биһиги кылааска кэлэҕэй мин эрэ буотах, үс хас уол баар, билигин бары дьоһуннаах уолаттар, киирэн-тахсан, саҥаран-иҥэрэн. Тыла суох дьону көрүстэхпинэ кэпсэтэн барабын😅 Таксига эҥин элбэхтэр эбит.