БОРБУЙ

Бу күннэргэ тар5ана сылдьар Сунтардааҕы оҕо дьоҕурун сайыннарар киин ыҥырытыыгар дьоҥҥо сөптөөх информацияны тиэрдэр сыалтан, быһаарыы биэрэбин: Быйылгы сыл хаһааҥҥытааҕар да үп өттүнэн уустук сыл буоларын бары бэккэ билэ сылдьабыт. Ол курдук Сунтаар улууһун бюджетыгар 2026 сылга аҥаардас үөрэҕирии тэрилтэлэрин үбүлээһинэ 618 млн. солкуобайынан аҕыйах кэлбитэ. Саҥа модельнай штатнай расписаниеҕа олоҕуран үөрэҕирии систематыттан уопсайа 430 штат сарбыллыахтаах этэ. Манна дьону көмүскүүр сыалтан улууска анал хамыыһыйа тэриллэн, өрөспүүбүлүкэбит үөрэҕирии министерствотын кытта үлэлэһэн, 430 штат эмискэ сарбыллара улуус дьонугар-сэргэтигэр улахан охсуулааҕын учуоттаан, туруорсан, уопсайа үөрэҕирии систематыттан 130,2 штат кыччатыллыбыта, ол иһигэр үөрэҕирии тэрилтэлэрин бухгалтердара 40 штат улустааҕы кииннэммит бухгалтерияҕа көспүттэрэ. Онон арыыйда халымардык аһардынныбыт. Дьон улэлээх буоларын туһугар улуус бары нэһилиэктэригэр эбийиэктэри сааһылааһын үлэтэ барда. Ол курдук гимназия дьиэтэ сабыллан, политехническай лицей урукку дьиэтигэр көстө, 4 уһуйаан реорганизацияланна, 7 үөрэҕирии эбийиэгэ консервацияланна, ону таһынан Толоон оскуолата Элгээйи оскуолатын филиала буолла. Сунтаардааҕы оҕо дьоҕурун сайыннарар киин бүгүҥҥү күҥҥэ диэри кыараҕас объекка хас да сиринэн тэнийэн үлэлээн олорор. Инник үлэлии олороро табыгаһа суох диэн, оҕолорго учугэй усулуобуйа тэрийэр сыалтан босхоломмут улахан иэннээх Сунтаардааҕы политехническай лицей дьиэтигэр көһөрөргө анал хамыыһыйа быһаарыныы ылбыта. Бары билэрбит курдук ити территория5а үс оскуола турар, оҕолор оскуола территиориятыттан ырааппакка кружоктарга сылдьалларыгар табыгастаах буоллун диэн. Онтон улуустааҕы типографияны сабан, дьиэ иһигэр улэлии олорор 6 тэрилтэ араас сирдэринэн көһөллөр. Сунтаардааҕы оҕо дьоҕурун сайыннарар киин дьиэтигэр 4 тэрилтэ киирэн улэлиэ. Манна даҕатан эттэххэ антитеррор ирдэбилинэн үөрэҕирии диэтигэр-уотугар араас хайысханнан үлэлии олорор тэрилтэлэр киирэллэрэ бобуулаах. Онон гимназия уонна ЦДТ лицей эргэ дьиэтигэр үлэлииллэрэ табыгастаах. Сунтаар улууһун социальнай уонна имиджевай бэлиитикэҕэ баһылыгын солбуйааччыта М.В. Иванов