Бүгүн урбаанньыттар сугулааннарыгар ыҥырыллан өҥөйө сырыттым. Учууталлар мунньахтарыттан чыҥха атын. Таһырдьаттан тэрээһин уратыта биллэр. Учуутал мунньаҕар кэллэххэ - "Дети" диэн суруктаах Газель, ПАЗик толору буолар, онтон манна крузактар да, лексустар - ким нүөмэрэ үчүгэйинэн куоталаспыттыы кэчигэрэспиттэр. Дьиэ иһигэр киирдэххэ, бастаан туймаарыаххар диэри духуу сыта тоҕо анньар. Кыргыттар бары да кылабычыгас сурунаалтан түспүт курдуктар, төбө көтө-көтө "кус" уостаахтар, мээчик уктубут курдук толору төгүрүк түөстээхтэр. Хобулуктара таас муостаҕа тоһугураан хайа үктүөх курдуктар. Үгүстэрэ байҕалга, итии дойдуга күн анныгар сылаамнаабыттара көстөр. Хас мэндиэмэн ахсын чэй, кофе, кэмпиэт арааһа эрээтинэн кэккэллии ууруллубут. Үптээх-харчылаах дьон мэтириэттэрэ маннык буоллаҕа дуу... Билбэт буоллаххытына - бүгүн, сарсын урбаанньыттар сугулааннара "Квартал труда" буола турар, кииритэ көҥүл, өҥөйө сылдьыҥ.