🎥 11 лістапада 1983 года памёр польскі аператар і рэжысёр, ураджэнец Брэста — Ежы Лімпан. Нарадзіўся 10 красавіка 1922 года ў 🏹 Брэсце. Паходзіў з асіміляванай габрэйскай сям’і. У дзяцінстве вучыўся ў Варшаве, быў актыўным у спартыўнай секцыі пры Таварыстве ўніверсітэту рабочых. Падчас нямецкай акупацыі трапіў у гета ў Воўміні, адкуль уцёк і хаваўся ў Варшаве пад іменем Ежы Ліпіньскі. Стаў жаўнерам Польскай Арміі Людовай, супрацоўнічаў з падпольнымі арганізацыямі, валодаў нямецкай мовай і нават перамяшчаўся па акупаванай Еўропе ў форме вермахта. Пасля Варшаўскага паўстання камандаваў аддзелам у Прушкаве. У 1945 годзе быў асуджаны на смерць (пазней замененую на 10 гадоў зняволення) за дэзертырства і ўзброены напад, але вызвалены ў 1948-м. Паспрабаваў паступаць на стаматалагічны факультэт, але ў выніку стаў студэнтам Вышэйшай фільмавой школы ў Лодзі. Адукацыю завяршыў у 1952 годзе, дыплом атрымаў у 1965-м. Адзін з заснавальнікаў польскай школы фільма. Працаваў з Анджэем Вайдай, Анджэем Мункам, Аляксандрам Фордам, Раманам Паланскім. Яго стыль — эмацыйная камера, рэзкае святло, набліжэнні твараў, поўнае ўцягванне ў сцэну (як, напрыклад, у «Канале» ці «Лотнай»). Частку крытыкаў называлі яго прыхільнікам італьянскага неарэалізму. У 1968 годзе, пасля антысеміцкай кампаніі ў Польшчы, выехаў у Вялікабрытанію. Працаваў у Нямеччыне, выкладаў у Мюнхенскай школе фільма і тэлебачання. Памёр у Лондане пасля няўдалай аперацыі на сэрцы.