Сёння 82 гады з дня нараджэння Івана Крука — праваабаронцы, грамадскага актывіста, былога палітвязня і ураджэнца Брэстчыны. Нарадзіўся 27 кастрычніка 1944 года ў 👢 Кажан-Гарадку (сёння 🪷 Лунінецкі раён, Брэсцкая вобласць). Паходзіць з сям’і рэпрэсаванага святара. Больш за тры дзесяцігоддзі служыў у праваахоўных органах, у тым ліку ў Астраўцы і Ваўкавыску. У 1995 годзе быў абраны дэпутатам мясцовага Савета ў Астраўцы, дзе адкрыта выступіў супраць вынікаў рэферэндуму 1996 года і пачаў займацца праваабарончай дзейнасцю. Падтрымку атрымаў ад вядомага праваабаронцы Барыса Звозскава. У 2006 годзе падчас прэзідэнцкай кампаніі быў асуджаны да 6 месяцаў арышту паводле артыкула 363 ч. 2 КК за «супраціўленне міліцыі». Беларуская праваабарончая супольнасць прызнала яго палітвязнем. Пасля вызвалення працягваў грамадскую актыўнасць: удзельнічаў у выбарчых кампаніях, збіраў подпісы, распаўсюджваў інфармацыйныя матэрыялы і актыўна выступаў супраць будаўніцтва Астравецкай АЭС. У 2009 годзе быў аштрафаваны за распаўсюд улётак і газет. У 2015 годзе Камітэт ААН па правах чалавека прызнаў парушэнне яго права на свабоду распаўсюду інфармацыі. Іван Крук стаў адным з каардынатараў кампаніі «Астравецкая атамная — гэта злачынства!», актывістам Руху «За Свабоду» і сябрам АГП. Іван Крук неаднаразова ўдзельнічаў у выбарчых кампаніях як кандыдат у дэпутаты, быў затрыманы за ўдзел у антыядзерным руху і стаў адным з яскравых прыкладаў грамадзянскай мужнасці і супраціву рэжыму. Зычым моцнага здароўя, стойкасці і павагі ад тых, хто працягвае змагацца за свабоду і годнасць у Беларусі.