🔳 Беларусы за тры дні сабралі грошы на пахаванне брэстаўчаніна Яна Памедора Рэуцкага. Беларусы за тры дні сабралі 30 тысяч злотых на развітанне і пахаванне Яна Памедора Рэуцкага, які памёр у Варшаве. Да збору далучыліся 343 чалавекі. Пра смерць Яна Памедора Рэуцкага (сапраўднае імя — Сяргей Пархаць) стала вядома ў аўторак, 20 кастрычніка. Ураджэнец Брэста працаваў барыстам у варшаўскай кавярні і адміністраваў шматтысячную інтэрнэт-суполку беларусаў Польшчы. Яго смерць узрушыла беларускую супольнасць, частку якой ён дапамагаў аб'ядноўваць. Пасля паведамлення пра смерць на платформе Zrzutka.pl адкрылі збор сродкаў. Планавалася сабраць 30 тысяч злотых (каля 6800 еўра, або 22 300 беларускіх рублёў). Грошы патрэбныя для арганізацыі развітання ў Варшаве, перавозкі праху ў Беларусь і ўсталявання надмагільнага помніка. Да раніцы суботы, 24 кастрычніка, удалося сабраць 30 010 злотых — нават крыху больш за запланаваную суму. Ахвяраванні зрабілі 343 чалавекі.