🌱 24 кастрычніка 1966 года памерла ўраджэнка Брэстчыны, матэматыца, філосафка і педагагіня Соф’я Яноўская. Нарадзілася 31 студзеня 1896 года ў 🐍 Пружанах (сёння Брэсцкая вобласць). З 1930 года працавала ў Маскоўскім універсітэце: загадвала кафедрай вышэйшай алгебры, а пасля — кафедрай гісторыі матэматыкі і матэматычнай логікі. У 1936 годзе ўпершыню ў СССР пачала чытаць лекцыі па матэматычнай логіцы. Яна была адной з ключавых фігур у станаўленні філасофіі матэматыкі ў СССР, садзейнічала стварэнню самастойнай кафедры матэматычнай логікі, актыўна пераасэнсоўвала філасофскія падыходы ў навуцы, распрацоўвала канцэпцыю ролі лагічнай строгасці ў пазнанні. Асаблівую ўвагу надавала пытанням гісторыі дэдукцыйна-аксіяматычнага метаду і праблеме бясконцасці. Яноўская арганізавала пераклады на рускую мову класічных прац Д. Гільберта, В. Акермана, А. Тарскага, С. Кліні, Д. Пойя, Р. Карнапа ды іншых, у шматлікіх выпадках выступаючы як аўтар уступных артыкулаў і навуковы кансультант. Сярод дасягненняў — развіццё савецкай школы філасофіі матэматыкі, папулярызацыя прац рускіх матэматыкаў і філосафаў, стварэнне навуковых семінараў і даследаванняў, якія паўплывалі на развіццё лагічнай навукі.