📜 22 кастрычніка 1837 года ў 🏹 Брэсце нарадзіўся гісторык і філолаг Вікенцій Макушаў — сябра-карэспандэнт Пецярбургскай акадэміі навук і даследчык гісторы паўднёвых славян У 1856 годзе ён скончыў Ларынскую гімназію ў Санкт-Пецярбургу, а ў 1860 — гістарыка-філалагічны факультэт Пецярбургскага ўніверсітэта. З 1862 па 1865 гады працаваў сакратаром расійскага консульства ў Дуброўніку, дзе вывучаў архіў Дуброўніцкай рэспублікі. Вынікам гэтай працы сталі артыкулы і магістарская дысертацыя пра гісторыю рэгіёна. У 1868 годзе Макушаў быў камандзіраваны ў Італію для працы ў архівах і бібліятэках Неапаля, Венецыі, Мілана, Палерма і Анконы. Ён сабраў каштоўны матэрыял пра гісторыю паўднёвых славян і албанцаў. Пасля вяртання заняў кафедру ў Варшаўскім універсітэце. У 1878 годзе яго абралі членам-карэспандэнтам Пецярбургскай акадэміі навук. Памёр 14 сакавіка 1883 года ў Варшаве.