✝️ 21 кастрычніка 1914 года нарадзіўся каталіцкі архібіскуп, першы кардынал незалежнай Беларусі Казімір Свёнтак, жыццё і дзейнасць каторага былі знітаваныя з Брэстчынай. Падчас Першай сусветнай вайны сям’я Свёнткаў была ў эвакуацыі, а пасля апынулася ў Баранавічах, дзе Казімір Свёнтак скончыў гімназію. У 1933 годзе паступіў у Пінскую вышэйшую духоўную семінарыю, а ў 1939 быў пасвечаны ў святары і пачаў служэнне ў Пружанах. У красавіку 1941 года яго арыштавалі савецкія ўлады па абвінавачванні ў шпіянажы, і ён два месяцы знаходзіўся ў турме ў Брэсце. Вызвалены пасля нямецкай акупацыі, Свёнтак вярнуўся ў Пружаны. У 1944 годзе яго зноў арыштавалі і асудзілі на 10 гадоў лагераў у Сібіры і Комі АССР. У 1954 годзе вярнуўся ў Беларусь і стаў пробашчам у Пінску. У 1991 годзе Свёнтак быў прызначаны архібіскупам і мітрапалітам Мінска-Магілёўскім, а ў 1994 Папа Ян Павел II надаў яму сан кардынала. У 2006 годзе Папа Бенедыкт XVI прыняў яго прашэнне аб адстаўцы з кіраўніцтва архідыяцэзіяй, але ён застаўся апостальскім адміністратарам Пінскай дыяцэзіі. Казімір Свёнтак памёр 21 ліпеня 2011 года і быў пахаваны ў крыпце кафедральнага касцёла ў Пінску.