🕯6 кастрычніка 2004 года ў амерыканскім Кліўлендзе памёр Васіль (Вацлаў) Мельяновіч — беларускі грамадскі дзеяч на эміграцыі і ураджэнец Брэстчыны. Ён нарадзіўся 28 жніўня 1934 года ў вёсцы Азярніца (сёння 🪷 Лунінецкага раёна). У 1944 годзе Мельяновіч апынуўся ў Германіі. Пасля вайны жыў у лагерах для перамешчаных асоб і вучыўся ў беларускіх гімназіях. У 1950 годзе пераехаў у ЗША, а праз чатыры гады пайшоў служыць у амерыканскае войска. Пасля звальнення ў 1956-м паступіў ва ўніверсітэт. У 1963 годзе атрымаў дыплом інжынера ў Нью-Ёркскім гарадскім каледжы, пазней — ступень магістра менеджменту ва ўніверсітэце Джорджа Вашынгтона. Мельяновіч актыўна ўдзельнічаў у жыцці беларускай эміграцыі: узначальваў Нью-Ёркскі аддзел Згуртавання беларусаў у Амерыцы, уваходзіў у рэдкалегію беларускіх выданняў. Працаваў у кампаніі AT&T, выкладаў у каледжы ў Мэрылендзе, кіраваў Беларускай рэспубліканскай секцыяй штата і Федэрацыяй беларускіх рэспубліканскіх клубаў ЗША. Ён працаваў беларускамоўным гідам на амерыканскіх выставах у Мінску і Брэсце. У 1989 годзе ўлады не дазволілі яму наведаць родную вёску. Пазней Мельяновіч жыў на два дамы — у ЗША і Мінску. За ўласныя сродкі ён правёў электрычнасць да хутара каля Лунінца, дзе жыла яго сваячка. Пасля смерці жонка, журналістка і мастачка Таццяна Антонава-Мельяновіч, пахавала яго прах у Азярніцы, побач з магілай дзеда.