✡️ 27 верасня 1942 года нацысты знішчылі габрэйскае гета ў ⛪️ Янаве (сёння Іванава ў Брэсцкай вобласці) разам з яго жыхарамі. Да 1939 года ў Іванаве жылі каля 5000 чалавек, палову з якіх складалі габрэі. Напярэдадні іудзейскай Пасхі (канец сакавіка) 1942 года ў Іванаве немцы, рэалізуючы нацысцкую праграму знішчэння габрэяў, пачалі арганізоўваць у мястэчку гета. Габрэям загадалі выселіцца са сваіх дамоў і перасяліцца ў гета. У верасні 1942 года гета было поўнасцю знішчана. Арганізатарамі і выканаўцамі забойстваў былі сілы СС і СД. 27 верасня былі забітыя каля 1500 вязняў — у пераважнай большасці жанчыны і дзеці. Мясцовых жыхароў прымусілі перавозіць на вазах і хаваць целы вязняў гета ў Рудскім лесе. Толькі нямногім габрэям Іванова ўдалося ўцячы і далучыцца да партызанскіх атрадаў. З гета ўсяго выжыла менш за 100 чалавек. У Іванаве два чалавекі — Лагодзіч Мікалай і яго жонка Феадосія, былі ўдастоены ганаровага звання «Праведнік народаў свету» ад ізраільскага мемарыяльнага інстытута «Яд Вашэм» «у знак найглыбейшай удзячнасці за дапамогу, аказаную габрэйскаму народу ў гады Другой сусветнай вайны» за выратаванне Кацковіч Нехеміі. Усяго ў Іванаве нацыстамі і іх саўдзельнікамі былі забітыя ад 3150 да 3500 габрэяў.