🥀 26 верасня 2015 года памёр сацыёлаг, сацыяльны філосаф і ўраджэнец Брэстчыны Уладзімір Абушэнка. Нарадзіўся ў 🏹 Пінску 22 красавіка 1957 года. З 1985 года — даследчык у Інстытуце філасофіі і права АН БССР, затым у Інстытуце сацыялогіі АН БССР. З красавіка 1990 па 2002 год — дацэнт кафедры сацыялогіі БДУ. У 2002 годзе стаў намеснікам дырэктара Інстытута сацыялогіі НАН Беларусі, а часова нават выконваў абавязкі яго кіраўніка. Абушэнка быў вядомы як культурсацыёлаг, даследчык тэарэтычнай сацыялогіі і гісторыі грамадскай думкі ў Беларусі. Ён удзельнічаў у міжнародных праектах, уваходзіў у рэдкалегіі часопісаў, у тым ліку быў сябрам навуковага савета выдання «Палітычная сфера». Таксама выкладаў курсы па тэарэтычнай сацыялогіі і сацыялогіі культуры. Пад яго кіраўніцтвам абараніліся маладыя навукоўцы, сярод якіх Ірына Красавцава, Святлана Радзівонава, Аляксандр Шэлест і Андрэй Камароўскі. Апошнія гады жыцця правёў у Ратамцы. Памёр на лецішчы, пахаваны на Усходніх могілках у Мінску.