🪷 8 верасня 1994 года ў👑 Маларыцкім раёне Брэсцкай вобласці створаны заказнік «Лукава». Ён быў утвораны для аховы адной з найбуйнейшых у Беларусі папуляцый венерынага башмачка жоўтага — рэдкага віду архідэй міжнароднага значэння. Заказнік плошчай 1523 га знаходзіцца на тэрыторыі Маларыцкага раёна, у непасрэднай блізкасці ад вадасховішча «Лукава». Асноўным землекарыстальнікам з’яўляецца Чарнянскае лясніцтва Кобрынскага лясгаса. Тэрыторыя размешчаная ў межах Верхне-Прыпяцкай раўніны і характарызуецца разнастайнасцю глебаў і расліннасці: тут сустракаюцца дубовыя, грабовыя і сасновыя лясы, а таксама забалочаныя ўчасткі. Такое спалучэнне ўмоў спрыяе існаванню шматлікіх рэдкіх відаў. У «Лукаве» выяўлена больш за 3 тысячы асобін венерынага башмачка, сустракаюцца і іншыя архідэі, у тым ліку пыльцегалоўнік чырвоны і тайнік яйкападобны. Акрамя архідэй, тут адзначаныя іншыя рэдкія расліны, унесеныя ў Чырвоную кнігу, а таксама багатыя запасы лекавых траў — ландыш майскі, багун балотны, валяр’яна, дзевясіл, клуква. Заказнік мае вялікае значэнне для захавання біяразнастайнасці Палесся.