✒️ 8 верасня 1997 года ў 🦬 Баранавіцкім раёне адкрыўся Музей-сядзіба Міцкевічаў «Завоссе». Сядзіба каля вёскі Завоссе вядомая як месца нараджэння Адама Міцкевіча ў 1798 годзе. Цяпер яна дзейнічае як мемарыяльны музей, адноўлены на старых падмурках. З часоў паэта захаваліся толькі старая ліпа і невялікая сажалка. Двор і фальварак, што належалі сям’і Міцкевічаў, існавалі з XVIII да пачатку XX стагоддзя. Іх выгляд зафіксавалі на малюнках Напалеон Орда і Эдвард Паўловіч. Пасля 1880-х гадоў засталося толькі гаспадарчае памяшканне-лямус, дзе некалі падчас вакацый жыў паэт з братам. Пазней і ён быў разбураны, а пасля Першай сусветнай вайны сядзіба цалкам знікла. У 1927 годзе на месцы былога фальварка ўстанавілі помнік Адаму Міцкевічу, які аднавілі ў 1955 годзе. Падчас рэканструкцыі 1996 года тэрыторыя і будынкі былі адноўлены, а помнік прыбралі.