✡️ 4 верасня 1942 года ў 🪷 Лунінцы (сёння Брэсцкая вобласць) нацысты знішчылі габрэйскае гета разам з яго жыхарамі. На 1 верасня 1939 года ў горадзе пражывала 4153 габрэя – 36,4 % насельніцтва. Горад быў заняты нямецкімі войскамі 10 ліпеня 1941 года, і акупацыя працягвалася 3 гады — да 10 ліпеня 1944 года. Нацысты абавязалі габрэяў арганізаваць орган самакіравання юдэнрат, які падпарадкоўваўся акупацыйнай адміністрацыі. У сакавіку 1942 года немцы, рэалізуючы гітлераўскую праграму знішчэння габрэяў, арганізавалі ў Лунінцы гета, якое займала тэрыторыю вуліцы Акружнай, сагнаўшы туды 3000 чалавек з Лунінца і бліжэйшых вёсак. Гета знішчалася на працягу жніўня-верасня 1942 года. 4 верасня 1942 года ў горад прыбыў пінскі атрад СД для знішчэння гета. У той дзень прыблізна да 16:00 былі забітыя апошнія вязні Лунінецкага гета — 2932 чалавекі, сярод якіх было 1429 жанчын і 1397 дзяцей. У 1967 годзе на брацкай магіле ахвяр генацыду габрэяў у Лунінцы ва ўрочышчах Магула і Бараўшчына (вуліца Прамысловая) быў усталяваны абеліск.