🛤 У Брэсце адкрылі мурал у памяць пра курсанта Дзмітрыя Гвішыяні, які загінуў, ратуючы людзей. У Брэсце 1 верасня адкрылі мурал у памяць пра Дзмітрыя Гвішыяні — выпускніка сярэдняй школы №30 і курсанта Ваеннай акадэміі, які загінуў пасля пажару ў пасажырскім цягніку. Пра гэта паведамляе БЕЛТА. Мурал з’явіўся на фасадзе школы №30, якую скончыў Дзмітрый. На ім намаляваныя яго партрэт, лакаматыў на чыгуначных рэйках, ордэн і надпіс «Подзвіг у імя жыцця». 28 жніўня 1999 года Дзмітрый Гвішыяні разам з сябрамі-аднакурснікамі ехаў з Брэста ў Мінск на вучобу. Позна ўвечары недалёка ад Драгічына загарэўся цеплавоз пасажырскага цягніка. Курсанты пачалі дапамагаць пасажырам. У гэты момант выбухнула акумулятарная батарэя, якая знаходзілася ў нішы паліўнага бака. Дзмітрыя абліло палаючым дызельным палівам. Ад атрыманых апёкаў ён памёр у ноч з 31 жніўня на 1 верасня. За мужнасць і самаахвярнасць пры выратаванні людзей Дзмітрыя Гвішыяні пасмяротна ўзнагародзілі ордэнам «За асабістую мужнасць». Яго імя навечна ўнесена ў спісы асабовага складу першага навучальнага ўзвода другога курса агульнавайсковага факультэта Ваеннай акадэміі. З 2001 года сярэдняя школа №30 Брэста носіць імя свайго выпускніка. На адкрыцці мурала прысутнічаў бацька Дзмітрыя — Барыс Гвішыяні. Ён адзначыў важнасць захавання памяці пра такія ўчынкі і перадачы яе наступным пакаленням.